Araratnews.am-ը գրել էր, որ «Այգ» հոգեբանական ծառայությունների կենտրոնի գիտական ղեկավար, պրոֆեսոր Ռուբեն Պողոսյանի մահվան մեջ մեղադրվողը անմեղսունակ է ճանաչվել: Գրել էինք նաև, որ հարազատների համար կասկածելի է այս եզրակացությունը: Անցել է արդեն մի քանի ամիս, սակայն դատական նիստերն անընդհատ հետաձգվում են: Տուժող իրավահաջորդների փաստաբան Ալբերտ Քարամյանն Araratnews.am-ի հետ զրույցում ասաց, որ իր բազմաթիվ միջնորդությունները դատախազությունն առանց հիմնավորման մերժում է: «Ես հաջորդ դատական նիստին՝ մարտի 7-ին, պատրաստվում եմ բողոքելու դատախազության այս գործելաոճի դեմ: Տպավորությունն այն է, որ ամբաստանյալը «վերեւներից» հովանավորյալ ունի, քանի որ ամեն ինչ անում են՝ նրան ազատելու համար»,- ասաց տուժողի իրավահաջորդների փաստաբանը:
Ալբերտ Քարամյանի խոսքով՝ Հրանտ Համբարձումյանը մեկ անգամ է եկել դատարան, սակայն նրան դատարան են բերել առանց ձեռնաշղթաների: Փաստաբանը չի հավատում, որ հոգեբանին սպանողն անմեղսունակ է, քանի որ որպես հոգեկան հիվանդ հաշվառված չի եղել, աշխատել է Մոսկվայում, հետո եկել է Երեւան:
Սոնա Դավթյան
