ՊՎԾ–ի կողմից ոստիկանությունում իրականացված ուսումնասիրությունների արդյունքում ՀՀ հատուկ քննչական ծառայությունում քրեական գործ է հարուցվել։ Այս մասին NEWS.am–ի հարցման ի պատասխան հայտնեց ՀՔԾ մամլո խոսնակ Մարինա Օհանջանյանը։
Նա նշեց, որ քրեական գործը հարուցվել է ՀՀ ՔՕ 308 –րդ՝ պաշտոնեական լիազորությունների չարաշահման և 310–րդ հոդվածի՝ ձեռնարկատիրական գործունեությանն ապօրինի մասնակցելու հատկանիշներով։ Գործի նախաքննությունն իրականացվում է Հատուկ քննչական ծառայությունում։
Ավելի վաղ հայտնել ենք, որ 2019 թվականի մայիսի 7-ից ծառայությունը ուսումնասիրություն է իրականացրել ՀՀ ոստիկանությունում՝ կապված տրանսպորտային միջոցների հաշվառման համարանիշերի գնման գործընթացների հետ։ ՊՎԾ պետի պաշտոնակատար Արգիշտի Քյարամյանը հայտարարել էր, որ ուսումնասիրելով պետհամարանիշների ձեռքբերման գործընթացը՝ ՊՎԾ-ն արձանագրել է, որ 2008-ից սկսած խախտվել է գնումների մասին օրենքը: Քյարամյանը նաեւ ասել էր, որ արձանագրված խախտումները եղել են թե՛ նախկինում, թե՛ ոստիկանապետ Վալերի Օսիպյանի ղեկավարման օրոք:
ՊՎԾ–ի այս հայտարարությունը ոստիկանապետ Վալերիյ Օսիպյանը «պոպուլիստական» էր որակել։
