ՀՀ օրհներգի հնչյունների ներքո մեկնարկեց 6-րդ գումարման Ազգային ժողովի 3-րդ նստաշրջանը: Մինչ աշխատանքների մեկնարկը ԱԺ նախագահ Արա Բաբլոյանը տեղեկացրեց, որ հաշվի առնելով առանձին ապրանքատեսակների գների բարձրացումը, ինչպես նաեւ օրեր առաջ Բաղրամյան 26-ում Սերժ Սարգսյանի հրավիրած խորհրդակցությունը, առաջարկում է հունվարի 23-ին հրավիրել խորհրդարանական լսումներ՝ գնաճի թեմայով:
Վարման կարգով ելույթ ունեցավ ԱԺ «Ելք» խմբակցության ղեկավար Նիկոլ Փաշինյանը: «Գնաճի մասին երբ որ խոսում ենք, ես ճի՞շտ լսեցի, ինչ-որ հանձնարարական վերագրելով Սերժ Սարգսյանին, արդյոք այդպե՞ս է, թե՞ ես սխալ լսեցի»,- հարցադրում արեց Փաշինյանը: Ի պատասխան Արա Բաբլոյանն ասաց, որ ամենայն հավանականությամբ Փաշինյանը լավ չի լսել, քանի որ ինքն ասել է, որ առաջարկությունն իր կողմից է եղել: «Դա իմ նախաձեռնությունն է, եւ մենք կանցկացնենք լսումներ, ավելին` ԱԺ տնտեսական հարցերի հանձնաժողովն ունի ծրագրային մոտեցում, որ պետք է ժամանակ առ ժամանակ անդրադառնալ մշտադիտարկումների արդյունքում»,- ասաց ԱԺ նախագահը:
Թեմային վարման կարգով անդրադարձավ նաեւ ԱԺ «Ելք» խմբակցության պատգամավոր Էդմոն Մարուքյանը: Նա հիշեցրեց, որ հնարավոր թանկացումների մասին իրենք խոսել են դեռեւս նախորդ տարի եւ նշել, որ հունվարի 1-ից նոր գնային բարձրացումներ են լինելու: «Այդ պահին չէի՞ք մտածում, որտեղի՞ց է ձեր զարմանքը, հարգելի գործընկերներ, հիմա այդ լսումներն անհիմաստ է կազմակերպելը, գազը բաց թողնելու միջոցառում է»,- ասաց Մարուքյանը:
Նա նշեց, որ ստեղծված իրավիճակում գնաճը զսպելու եւ առկա վիճակը մեղմելու միակ եւ ճիշտ լուծումը հունվարի 19-ին փողոց դուրս գալն է:
Քաղաքացիներին՝ ընդդեմ թանկացումների նախատեսված երթին մասնակցելու կոչով դիմեցին նաեւ Փաշինյանն ու Արամ Սարգսյանը:
Փայլակ Ֆահրադյան
