Հայաստանում ընտրական քարոզարշավները վերածվում են խոստումների արշավի

Հայաստանում ընտրական քարոզարշավները՝ համապետական թե տեղական, ընտրողի հայեցողական դիրքորոշման հետևանքով վերածվում են խոստումների արշավի. մասնակից թեկնածուները յուրօրինակ մրցարշավի են դուրս գալիս. տրված աներևակայելի խոստումները երբեմն գլխապտույտ են առաջացնում ընտրողի մոտ: Խոստումների այդ հեղեղը խանգարում է ընտրողին ՝ նվազեցնելով ընտրությանը մասնակցելու դրդապատճառները, շարժառիթը, հետաքրքրությունը:
Մինչդեռ քաղաքացիական հասարակության ինստիտուտների ընտրողի հետ համապատասխան աշխատանքի հետևանքում հնարավոր է նախընտրական «խոստումների ժամանակաշրջանը» վերածել «խոստումներ կորզելու ժամանակաշրջանի»:

Հանրությունը ցանկացած ընտրարշավի ժամանակ պետք է ունենա ձևավորված առաջարկներ՝ միտված պետության ամրապնդմանը, տնտեսության զարգացմանը, սոցիալական խնդիրների լուծմանը և այլն:

Ցանկացած ընտրություն ենթադրում է պարիտետային՝ իրավահավասար փոխհարաբերություններ ընտրողի և ընտրվողի միջև:

Երևան քաղաքի ավագանու ընտրություններին կհաջորդի Երևանի 2800-ամյակի տոնակատարությունը:

Այդ կապակցությամբ ճիշտ կլիներ, որ երևանցիները ընտրական քարոզարշավի մասնակիցներին առաջարկություն ներկայացնեին, հաղթելու դեպքում, Երևանում նախաձեռնել պետական, մշակութային, կրթական, սպորտային և ազատ ժամանցի 28 շինությունների կառուցման գործընթաց՝ կառույցների նախագծման, ֆինաննսավորման, կառուցման աշխատանքներին մասնակից դարձնելով ամբողջ հայությանը: Այդ կառույցներն իրենց նշանակությամբ պետք է հավասարվեն օպերայի և բալետի շենքային համալիրին: Եթե, նույնիսկ, շինարարությունը ձգվի տասնյակ տարիներ ՝ պետք է նախաձեռնել այն:

Չէ ո՞ր հանրության դրական ընկալման դեպքում ցանկացած գաղափար ի վերջո դառնում է իրականություն:

Ի՞նչ պետք է պահանջել ավագանու ապագա անդամներից, քաղաքապետից, քաղաքապետարանից:
Առաջին հերթին հողահատկացում (քաղաքում կան հարյուր հազարավոր քառակուսի մետրեր ընդգրկող նախկին արտադրական, կենցաղային և այլ բնույթի բազմաթիվ չօգտագործվող ձեռնարկություններ, հիմնարկներ, տարածքներ), Հայաստանից և սփյուռքից երիտասարդ ու խոստումնալից նախագծող- ճարտարապետների ներգրավում, գաղափարի հանրայնացման միջոցով՝ ֆինանսական աղբյուրների հայթհայթում և այլն:

Նաև նմանատիպ գաղափարներն ու դրանց իրականացումներն են համախմբում մարդկանց որպես մեկ էթնիկ, սոցիալական և մշակութային հանրություն:

Ձոնիկ Մարգարյան