Ռոսգվարդիայի ստորաբաժանումները արդեն մտել են Մոսկվայում «Մենշևիկ» ֆաբրիկայի տարածք, որտեղ նախկին սեփականատերը հրաձգություն էր սկսել. այս մասին հաղորդել է ՌԴ ՆԳՆ մայրաքաղաքի գլխամասի մամուլի ծառայության պետը:
«Հատուկ ստորաբաժանումներն աշխատում են շենքի ներսում, կատարվում է տեղանքի մաքրում: Ներսում պատանդներ չկան: Կրակողի գտնվելու ստույգ տեղը չի պարզվել»,- ասել է նա, նշելով, որ հրաձիգը կարող է թաքնված լինել շենքի տարածքում:
«Առայժմ հայտնի է միայն մեկ զոհվածի մասին, վիրավորների մասին տեղեկություններ չկան»,- հավելել է ոստիկանության ներկայացուցիչը:
Հիշեցնենք, որ այսօր առավոտյան ժամը 09.00-ին վիճաբանություն է տեղի ունեցել տնտեսավարող սուբյեկտների միջև: Ֆաբրիկայի նախկին սեփականատերը, գտնվելով ֆաբրիկայի տարածքում, լեզվակռվի մեջ է մտել ձեռնարկության ներկայիս ղեկավարության հետ: Որից հետո նա հանել է զենքը և կրակել պահակին, որը ստացած վիրավորումից մահացել է:
