Դեկտեմբերի 9-ին Ազգային ժողովի արտահերթ ընտրություններին մասնակցելու է նաև քաղաքագետ Լեւոն Շիրինյանի գլխավորած՝ Հայաստանի քրիստոնեա-ժողովրդավարական կուսակցությունը: Ի՞նչ ակնկալիքներով է մասնակցում ընտրություններին Լեւոն Շիրինյանը եւ իրեն ո՞ր դաշտում է տեսնում. տեղեկացավ Araratnews.am-ը Լեւոն Շիրինյանից:
Պարո՛ն Շիրինյան, հրապարակվել են ընտրություններին մասնակցող քաղաքական ուժերի ցուցակները, որոնց վերաբերյալ հանրության գնահատականն այնքան էլ դրական չէ: Դուք ի՞նչ կարծիք ունեք ձեր մրցակիցների ցուցակների մասին:
Դժվար հարց եք տալիս: Մրցակիցների մասին ի՛նչ խոսեմ: Ես գիտեմ, որ դոկտոր, պրոֆեսոր միայն մեր կուսակցության ցուցակում կա:
Դուք ո՞ր գաղափարախոսության կրողն եք եւ ո՞ր բեւեռում եք հանդես գալու:
Մենք հետազոտական աշխատանք անողներ ենք եւ բերում ենք նոր երևույթ՝ այլընտրանք, որպեսզի դիմություն-ընդդիմություն հակադրությունը, որը երբեմն կուլմինացիայի է հասնում, մեղմանա: Բերում ենք նոր ծրագրեր, նոր տեսություն:
Իշխանության ո՞ր մոտեցմանն եք այլընտրանք:
Տնտեսականին եք այլընտրանք: Եթե Հայաստանում արդյունաբերությունը չվերագործարկվի եւ քարի արդյունաբերության հիման վրա արդյունաբերական համալիր չլինի, ճիշտ չի լինի: Եթե պայքար չլինի «խորքային» պետության դեմ, Հայաստանի դեմոկրատացում չի լինի:
Խորքային պետություն ասելով՝ նկատի ունեք քրեաօլիգարխիկ համակա՞րգը:
Այո՛: Այն դեռ չի կազմաքանդվել: Ֆասադը մաքրված է, բայց համակարգը կա: Հարկային օրենսդրություն չի փոխվել, հարկայինում աշխատող անձնակազմը չի փոխել, կրթությունը չի բարեփոխվել…
Քանի՞ մանդատի եք հավակնում:
Եթե զանգեք ինձ քարոզարշավի 5-րդ օրը, ես ձեզ ճշգրիտ կասեմ:
Դուք ասացիք՝ ընդդիմություն ասածը չեք ընդունում…
Ոչ թե չենք ընդունում, այլ մենք ընդդիմություն չենք լինելու: Մենք թիկունք ենք կանգնելու վարչապետին՝ հեղափոխության իդեալներն իրականացնելու, բայց Հայաստանում բացարձակ քաղաքական մեծամասնություն չպետք է լինի:
Հայաստանի հանրապետական կուսակցությունը հայտարարել է՝ իշխանության միակ ընդդիմությունն է: Համամի՞տ եք այս հայտարարությանը:
ՀՀԿ-ն քանի՞ լոզունգ է ներկայացրել, ու քանի՞սն են կյանքի կոչվել: ՀՀԿ-ն այն ուժն է, որը պետք է արգելվեր երկիրն աղետի առաջ կանգնեցնելու եւ ապրիլյան պատերազմ առաջացնելու համար: Այլ երկրում նման կուսակցությունը կինքնալուծարվեր, կամ գոնե շեֆին կփոխեին: Իսկ մեզ մոտ ուղղակի ՀՀԿ-ն մի քանիսին հեռացրեց:
Ձեր կուսակիցներից ռեյտինգային ընտրակարգով առաջադրվողներ կա՞ն:
Այո՛, 5-ական թեկնածու ունենք: Մենք դեմ ենք հակապետական այս օրենքին, բայց փորձում ենք օգտակար լինել մեր պետությանն ու ժողովրդին:
Կուսակցության գործունեության համար ֆինանսներ են պետք: Ձեր ֆինանսավորման աղբյուրը ո՞րն է:
Իմ ֆեյսբուքյան էջում գրել եմ, որ դիմում եմ աշխարհի բոլոր հայերին: Ես իմ ընկերներով, համախոհներով կգնամ քաղաքականություն, եթե դուք ձեզ վրա վերցնեք որոշակի պարտավորություն: Ստացվում է, որ Հայաստանի ժողովուրդը, որն ունի ֆինանսական հնարավորություն, առանց որեւէ պարտքի պետք է օժանդակի քաղաքական կառույցներին, իսկ քաղաքական կառույցներն էլ առանց պարտավորության պետք է ծառայեն պետությանը:
Սոնա Դավթյան
