Հավաքական անվտանգության պայմանագրի կազմակերպության անդամ երկրների ղեկավարներն այսօր կայացած հանդիպման արդյունքում ընդունել են համատեղ հայտարարություն, որում, մասնավորապես, անդրադարձ է կատարվում արցախյան հակամարտության կարգավորմանը:
Հայտարարության տեքստը տեղադրված է Ռուսաստանի նախագահի պաշտոնական կայքում:
«Մենք՝ ՀԱՊԿ անդամ երկրների ղեկավարներս, նշում ենք Լեռնային Ղարաբաղի հակամարտության խաղաղ կարգավորման անհրաժեշտությունը՝ ընդգծելով այս հակամարտության կարգավորման սկզբունքների վրա ԵԱՀԿ Մինսկի խմբի համանախագահների միջնորդությամբ կատարվող աշխատանքը շութափույթ ավարտելու կարևորությունը: Դա պետք է հիմնված լինի միջազգային իրավունքի սկզբունքների և նորմերի, ՄԱԿ-ի կանոնադրության, Հելսինկյան եզրափակիչ ակտի, մասնավորապես ուժի չկիրառման, պետությունների տարածքային ամբողջականության, իրավահավասարության և ժողովուրդների ինքնորոշման իրավունքների վրա», — ասված է տարածված հայտարարությունում:
Հավելենք, որ Ռուսաստանի, Հայաստանի, Բելախուսի, Ղազախստանի, Ղրղզստանի և Տաջիկստանի ղեկավարները գագաթնաժողովի արդյունքում ընդունել են 22 փաստաթուղթ:
