«Ամենակարևոր գործը փողոցում մարդկանց պայքարն է, ժողովուրդը պետք է պայքարի: ՀՀ-ի վրա կախված է մարտահրավեր՝ հանրապետության վերացման մարտահրավեր: Ստեղծվելու է կուսակցապետություն»,- ֆեյսբուքյան ասուլիսի ընթացքում ասաց «Չեք անցկացնի» նախաձեռնության անդամ Դավիթ Հովհաննիսյանը: Պնդում է՝ այդ գիտակցումը մարդկանց պետք է բերի հրապարակ:
Անդրադառնալով Սերժ Սարգսյանի հայտարարությանը, որ ինքը որևէ պաշտոն ստանձնելու մտադրություն չունի՝ Դավիթ Հովհաննիսյանն ասաց. «Սերժ Սարգսյանն ասել է՝ չի զբաղեցնելու նախագահի, վարչապետի պաշտոնը, բայց այս համակարգում ո՞վ է գիժ՝ գնա զբաղեցնի սիմվոլիկ պաշտոն»:
Նախաձեռնության մեկ այլ անդամ Հրայր Մանուկյանն էլ նշեց՝ հասարակության մոտ չպետք է լինի կարծիք, որ իրենք մարդկանց են իրենց հետևից տանում:
Հրայր Մանուկյանը պնդեց կհաղթեն՝ եթե միասնաբար պայքարեն, պետք է համախմբվեն ոչ միայն հրապարակներում, այլ նաեւ քվեարկությանը նախորդող շրջանում: Նախաձեռնության անդամը համոզված է՝ այսօր Ազատության հրապարակը բազմամարդ կլինի:
Հիշեցնենք՝ այսօր ժամը 18:00-ին Ազատության հրապարակում տեղի կունենա հանրահավաք՝ ընդդեմ Սահամանդրական փոփոխությունների:
