Երեկ Հանրապետական խմբակցության ղեկավար Վահրամ Բաղդասարյանն, անդրադառնալով «Նոր Հայաստան» ընդդիմադիր ճակատի հայտարարությանը, արձագանքեց՝ «իրավապահ մարմինները ձեռքները ծալած չեն նստի»: Այս հայտարարության եւ իրենց հետագա անելիքների մասին Araratnews.am-ը զրուցեց «Ժառանգություն» կուսակցության փոխնախագահ Արմեն Մարտիրոսյանի հետ:
—Պարո´ն Մարտիրոսյան, «Նոր Հայաստան» ընդդիմադիր ճակատը դեկտեմբերի 1-ին պայքարի վճռական փուլ է սկսում, այդ օրը, հայտարարվեց, լինելու է քաղաքացիական անհնազանդության օր: Երևի հիշում եք «Հիմնադիր խորհրդարան»-ի հայտարարություններն ու կոչերը՝ ապրիլի 24-ի հետ կապված, կհիշեք նաեւ դրան նախորդող եւ հաջորդող իրադարձությունները, չե՞ք կարծում՝ այս անգամ էլ գուցե կրկնվեն իրադարձությունները, չեզոքացնեն ձեզ:
-Չգիտեմ՝ ինչ կանեն, բայց ինչպես այն ժամանակ էր այդ ամենն ապօրինի, այս անգամ էլ ապօրինի կլինի: Սակայն, եթե այն ժամանակ կար արդարացում՝ իբրև միջազգային հանրության անվտանգությունն էին ուզում ապահովել, ապա այս անգամ նման խնդիր չի կարող լինել նախ այն պատճառով, որ օրենքով սահմանաված կարգով իրենք քաղաքական պրոցեսն են ակտիվացրել, երկրորդ՝ որևէ մեկը բռնության կոչ չի արել, ուստի միայն ապօրինի գործողությամբ կարող են ազատազրկել միասնական շտաբի անդամներին:
-Այսինքն՝ չե՞ք բացառում, որ նման գործողություններ կիրականացվեն:
-Իսկ Հայաստանում այդպիսի բան կարելի՞ է բացառել: Մենք ունենք Շանթ Հարությունյան քաղբանտարկյալ, ունենք Վոլոդյա Ավետիսյան քաղբանտարկյալ, ինչի՞ մասին է խոսքը:
-Հանրապետական խմբակցության ղեկավարը հայտարարեց՝ «իրավապահ մարմնինները ձեռքները ծալած չեն նստի», ըստ Ձեզ՝ սա զգուշացո՞ւմ էր, ի՞նչ եք պատրաստվում անել:
-Իրենց եթե նայենք՝ Հայաստանից միայն մի ճանապարհ կա՝ արտագաղթել: Իրենք միայն այդ ճանապարհն են ազատ թողնում, իրենց ասածն օրենքից դուրս է, մենք օրենքի շրջանակում ցանկանում ենք երկրում արմատական փոփոխություններ իրականացնել, ուստի իրենց ասածին ուշադրություն դարձնելով՝ անում ենք մեր գործը:
—Ասում եք՝ օրենքի շրջանակում եք գործելու, բայց նաեւ նշում եք, որ իրավապահ մարմինները շրջանցում են օրենքը, այդ դեպքում ինչի՞ վրա եք հույս դնում:
-Ո՞նց ինչի վրա, մեզ վրա ենք հույս դնում: Իհարկե, հասկանում եմ՝ դաշտում կան իրենց ընդդիմադիր ուժ կոչող քաղաքական կուսակցություններ, որոնք մտածում են՝ իշխանությունն իրենց կմատուցվի կապույտ սկուտեղով, բայց մեր պայքարի տրամաբանությունն այլ է: Մենք կարծում ենք, որ քաղաքացիական անհնազանդությամբ, քաղաքացիների ակտիվ մասնակցությամբ է հնարավոր երկրում բան փոխել:
-Եթե կրկնվի այն, ինչ եղավ ապրիլի 24-ից առաջ, Պարո´ն Մարտիրոսյան, հետո՞:
-Ձեր ասածը «Գնացի մարդի, ունեցա որդի» տարբերակն է: Հենց այդպիսի բան լինի՝ այդ ժամանակ էլ հարցը կուղղեք:
-Իսկ «Գնացի մարդի, ունեցա որդի» տարբերակին, այնուամենայնիվ, այլընտրանք չե՞ք ուզում մտածել:
-Շնորհակալություն, որ զգուշացրեցիք, մի բան կմտածենք:
Զրուցեց՝ Շողիկ ԳԱԼՍՏՅԱՆԸ
