Ղազախստանի Ալմաթի քաղաքում ծեծի է ենթարկվել ընդդիմադիր գլխավոր լրատվամիջոցներից մեկի` ADAM bol ամսագրի գլխավոր խմբագիր Գուլժան Երգալիևան: Այս մասին հաղորդում է Interfax գործակալությունը:
«Երեկ ուշ երեկոյան մոտ 22:00-ի սահմաններում հարձակում է տեղի ունեցել ADAM bol ամսագրի գլխավոր խմբագիր Գուլժան Երգալիևայի վրա: Անհայտ անձինք սպասել են Երգալիևային նրա տան շքամուտքում: Հարձակումը տեղի է ունեցել այն պահին, երբ գլխավոր խմբագիրը մտել է վերելակ», — ասել են խմբագրությունում:
Անհայտ անձինք սկսել են խփել նրա գլխին, ինչից հետո փախուստի են դիմել: Խմբագրությունում չեն բացառում, որ հարձակումը կապված է Երգալիևայի պրոֆեսիոնալ գործունեության հետ:
Ներկայում Երգալիևայի ամսագրի նկատմամբ հայց է ներկայացված գլխավոր դատախազության կողմից, իրավապահները պահանջում են փակել ADAM bol ամսագիրը:
