ՀՀ Կառավարության այսօրվա նիստի մեկնարկին վարչապետ Կարեն Կարապետյանը հանդես եկավ հերթական հանձնարարականներով:
Հանձնարարականներից մեկը վերաբերում էր գազալցակայանների շահագործման թերություններին:
«Գազալցակայանների կողմից տեխնիկական անվտանգության կանոնների պահպանման եւ մատուցվող ծառայությունների որակը գնահատվում է խիստ անբավարար: Միայն վերջին շրջանում գրանցվել է գազալցակայաններում գազաբալոնների պայթման մի շարք դեպքեր, ինչը պայմանավորված է դրանց նկատմամբ թերի վերահսկողությամբ»,- նշեց վարչապետը:
Կարեն Կարապետյանն ընդգծեց, որ խիստ մտահոգիչ է հատկապես այն, որ մինչ օրս առկա չէ գազալցակայաններում տրամադրվող մթնոլորտային ճնշման թույլատրելի չափը խախտելու դեպքերի կանխարգելման գործուն համակարգ:
«Հաշվի առնելով խնդրի կարեւորությունը` հանձնարարում եմ ՀՀ արտակարգ իրավիճակների եւ տնտեսական զարգացման եւ ներդրումների նախարարներին մեկամսյա ժամկետում համատեղ ամփոփելով նշված ոլորտում իրականացված տեսչական ստուգումների արդյունքները` Կառավարության աշխատակազմ ներկայացնել համապարփակ առաջարկություններ առկա խնդիրների վերաբերյալ»,- հավելեց Կառավարության ղեկավարը:
