«Համախմբում» կուսակցությունը առաջիկա խորհրդարանական ընտրություններում, բացի իշխող Հանրապետականից, մյուս բոլոր քաղաքական ուժերի հետ համագործակցությունը չի բացառում: Այս մասին այսօր լրագրողների հետ հանդիպմանը հայտարարեց կուսակցության նախագահ, նախկին արտգործնախարար Վարդան Օսկանյանը:
«Այս պահին անուն չեմ տա, բայց կասեմ հետևյալը. մենք ոչինչ չենք բացառում, պատրաստ ենք բոլորի հետ խոսելու»,- ասաց Վարդան Օսկանյանը, հավելելով, որ դաշինքով ընտրությունների գնալը ցանկալի կլինի:
«Եթե մենք ընտրություններին գնանք առանձին, ապա ցուցակը գլխավորելու եմ ես: Եթե գնանք դաշինքով, ես անձամբ եւ կուսակցության յուրաքանչյուր անդամ պատրաստ է իր անձնական հավակնությունները մի կողմ դնել եւ շարժվել ըստ իրավիճակի»,- նշեց նա:
«Բարգավաճ Հայաստան» կուսակցությունը լքած Օսկանյանը պատրաստ է համագործակցելու նաեւ նախկին թիմի հետ, եթե անգամ ԲՀԿ-ն կրկին ղեկավարի կուսակցության նախկին առաջնորդ Գագիկ Ծառուկյանը:
«Մենք ճանապարհ ենք անցել, համոզված եմ՝ թե՛ ես, թե՛ մեր գործընկերները չենք փոշմանել: Մենք խնդիր էինք դրել խաղաղ ճանապարհով, օրինակական միջոցներով երկրում իրավիճակ փոխել: Հիմա լսում եմ բազմաթիվ մեկնաբանություններ, որոնք իրականությանը չեն համապատասխանում»,- շարունակեց Օսկանյանը, համոզմունք հայտնելով, որ վերադարձից հետո էլ Գագիկ Ծառուկյանը կկարողանա քաղաքական դաշտում լուրջ դերակատարություն ունենալ:
