Forbes-ը E-Poll Market Research հետազոտական գործակալության հետ համատեղ հրապարակել է ԱՄՆ-ում 2014 թվականի ամենաազդեցիկ հայտնի մարդկանց ցուցակը։
Ամերիկացիների շրջանում անցկացված հարցման արդյունքում պարզ է դարձել, որ ամենաազդեցիկն այս ցուցակում հայտնի կինոռժիսոր Սթիվեն Սփիլբերգն է, ով առաջ է անցել հեռուստահաղորդավար Օփրա Ուինֆրիից և «Աստղային պատերազմներ» ֆիլմի ռեժիսոր Ջորջ Լուկասից։
Հարցման ժամանակ E-Poll Market Research-ը ամերիկացիներին առաջարկել է 6600 հայտնի մարդկանց գնահատել 46 չափանիշներով։ Առաջին տասնյակում են նաև կինոռեժիսորներ Ռոն Հովարդը, ով նկարահանել է «Մտավոր խաղեր», «Դա Վինչիի ծածկագիրը», «Ապոլոն 13»-ը, և Մարտին Սկորսեզեն, ով հեղինակել է «Տաքսիստը», «Նյու Յորքի բանդաները», «Ժամանակի պահապանը»։
Բացի այդ, ցուցակում են թուրքական ծագմամբ ամերիկացի բժիշկ Մեհմետ Օզը, ով հեռուստատեսությամբ վարում է «Դոկտոր Օզի շոու» հաղորդումը, հեռուստահաղորդավար Բարբարա Ուոլթերսը, U2 խմբի մեներգիչ Բոնոն, կոմիքսների հեղինակ Սթեն Լին, ռադիոհաղորդավար Ռաշ Լիմբոն։
