Հունիսի 30-ին Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում ընդունել է Ամերիկայի Միացյալ Նահանգների Ֆիլադելֆիա քաղաքից ուխտավորաբար հայրենիք ժամանած հայորդիներին՝ ուղեկցությամբ ԱՄՆ Հայոց Արևելյան թեմի Ֆիլադելֆիայի Սուրբ Երրորդություն եկեղեցու հոգևոր հովիվ Արժանապատիվ Տեր Հակոբ քահանա Գևորգյանի: Այս մասին հայտնում են Մայր Աթոռի տեղեկատվական համակարգից:
Այնուհետև Ամենայն Հայոց Կաթողիկոսը, հայրական իր օրհնությունը բերելով ամերիկաբնակ հայորդիներին, ողջունեց սփյուռքի տարբեր համայնքներից ուխտագնացությունների կազմակերպումը՝ ընդգծելով, որ նմանատիպ այցելությունները հայրենիքը տեսնելու և ուխտը նորոգելու լավագույն առիթ են դառնում: Այդ հարցում Նորին Սրբությունը կարևոր նկատեց Հայաստանում հասակ առած հոգևոր սպասավորի առաքելությունը սփյուռքում, որի ծառայության շնորհիվ օտարության մեջ ապրող հայը շարունակում է սնվել ազգային-հոգևոր արժեքներով:
Նորին Սրբությունը նաև պատասխանեց ուխտավորների հարցերին, որոնք վերաբերում էին հոգևորականների պատրաստությանը, հայրենական կյանքին, Հայաստանին և Սուրբ Էջմիածնին իրենց ծառայությամբ օգտակար լինելու ուղիներին:
Վերջում Նորին Սրբությունը իր օրհնությունն ու ջերմ բարեմաղթանքները փոխանցեց ուխտավորներին և Ֆիլադելֆիայի հայ համայնքին` առանձնակի կերպով գնահատելով նրանց ազգային ոգին ու հավատարմությունը Մայր Եկեղեցու հանդեպ:
