Դեղերը կթանկանան, Վրաստանից անօրինական դեղ բերելն էլ կավելանա (տեսանյութ)

Հայաստանում դեղարտադրությունն ավելացել է 16,1, արտահանումը` 20,2 տոկոսով: Այս մասին այսօր հայտարարեց ՀՀ դեղարտադրողների և դեղ ներմուծողների միության նախագահ Սավել Զաքարյանը:

Խոսելով առողջապահության նախարարության նոր կարգի մասին,  ըստ որի՝ առանց դեղատոմսի հնարավոր չի լինելու դեղ գնել այս տարվա մարտի մեկից,  խստորեն  կանոնակարգվելու է դեղերի ոլորտը, առողջապահական տեսչությունն էլ  վերահսկելու է  այն, Սամվել Զաքարյանն ասաց` մարզերում ենթակառուցվածքները զարգացած չեն, ինտերնետն էլ այնքան ուժեղ չէ, որ կարողանան  համակարգչով փնտրել այն դեղը, որն անհրաժեշտ է հիվանդին:

Բանախոսը կարծում է, որ այս որոշումը սոցիալական բեռ  է հանրության վրա.  անգամ  պոլիկլինիկայում բժշկին որոշ գումար են տալիս,  երբեմն էլ բժիշկը կարող է հիվանդին հետազոտվելու ուղարկել: «Լավ կլիներ, որ առողջապահության նախարարությունը նման որոշում ընդունելիս հաշվի առներ մասնավոր հատվածի կարծիքը: Տպավորությունն այն է, որ նախարարությունը կտրված է ռեալ կյանքից, ընդունում է որոշումներ, որոնք խառնում են ժողովրդի կյանքը»,- ասաց միության նախագահը:

Araratnews.am-ի  հարցին, թե արդյոք այս որոշումից հետո դեղերի թանկացում կլինի՞, բանախոսն ասաց, որ  դեղերը կթանկանան, իսկ Վրաստանից անօրինական  դեղ  բերողների թիվն էլ կավելանա:  «Ամսվա կտրվածքով, եթե Վրաստանից ես դեղ բերում, խնայում ես 200-400 հազար դրամ»,- հավատացրեց  պրն Զաքարյանը:

Մեր մյուս հարցին, թե արդյոք կոռուպցիոն ռիսկեր չեն լինի, օրինակ դեղատանը գաղտնի լինեն դեղատոմսի համապատասխան ձեւաթղթերը,  բանախոսը դժվարացավ ասել:

Իսկ արդյոք այս որոշումից հետո պարտադիր է դեղագետ լինել դեղատանն աշխատելու համար, եթե ընդամենը պետք է դեղատոմսով նշանակված դեղը վաճառել հիվանդին, Սամվել Զաքարյանի խոսքով՝ այս որոշումից հետո գրվելու է ոչ թե դեղի անունը, այլ ազդող նյութը:

Մանրամասները՝ տեսանյութում:

Սոնա Դավթյան