Այսօր հարթաթաթությունը ոտքերի ամենատարածված հիվանդություններից է, որը ոտնաթաթի տեսքի փոփոխության, յուրօրինակ քայլվածքի և այնպիսի բարդությունների պատճառ կարող է դառնալ, ինչպես ասենք ողնաշարային հիվանդություններն են (ճողվածքներ, օստեխոնդրոզ ևն), ինչպես նաև ծնկահոդի հիվանդությունները` մենիսկի բորբոքումը, ձևախեղող արթրոզները, ծնկի հոդախախտը: Ցանկը բնականաբար ամբողջությամբ ներկայացնելը նպատակահարմար չէ, սակայն արժե նշել, որ հարթաթաթության հետևանքով առաջանում են նաև հենց թաթի հիվանդություններ.օրինակ` կոշտուկներ, կրունկի ճաքեր, մատների ծռում, նևրոզ: Ախտանշանները սակայն` ոտքերում ծանրության զգացումն ու մկանային ցավը միշտ չէ, որ հարթաթաթության մասին են վկայում:
Բժիշկներն ասում են, որ «հնացած» հարթաթաթության ժամանակ այդ ախտանշաններն անհետանում են, որվհետև, տարիների ընթացքում օրգանիզմը հարմարվում է նոր վիճակին: Հարթաթաթության հետևանքով առաջացած բարդությունները բուժելիս պետք է բուժել նաև հիմնական պատճառը, հակառակ պարագայում դրական արդյունք չի ստացվի: Օրինակ` հարթաթաթության հետևանքով առաջացած օստեոխոնդրոզը բուժելիս եթե չվերացվի հիմնական պատճառը, ապա հետևանքը կլինի այն, որ հիվանդությունը պարզապես կխորանա:
Հարթաթաթությունը բոլոր հիվանդությունների նման համալիր բուժում է պահանջում: Պետք է կանոնավոր կերպով զբաղվել հատուկ մարմնամարզությամբ, մերսման պրոցեդուրաների հաճախել ու հատուկ կոշիկներ հագնել: Դրանք պետք է կիպ գրկեն ոտքերը, ունենան ճկուն ներբան ու ցածր կրունկ: Խորհուրդ է տրվում կոշիկի մեջ օգտագործել հատուկ միջադիր-սուպինատորներ: Կանխարգելման ու բուժման համար օգտակար է ավազի վրա կամ էլ նոսր ջրում ոտաբոբիկ քայլելը, ցատկոտելն ու սպորտային խաղեր խաղալը: Բուժման նպատակով խորհուրդ է տրվում`կանգնել ոտնաթաթերի վրա ու այդ դիրքով 20-30 վայրկյան քայլել: Դրանից հետո ձեռքերը դնել գոտկատեղին ու քայլել նույնքան ժամանակ: Ոտքի մատները ծալել , ձեռքերը` կոնքին, քայլել ներբանների արտաքին կամարին հենվելով` 20-30 վայրկյան: Ներբանի տակ թենիսի գնդակ հարմարեցնել ու նույն դիրքով քայլել ևս մի քանի վայրկյան:
Կամ էլ`պառկել փորի վրա,ձեռքերն առաջ մեկնել ու մեջքն ուղղել: Դրանից հետո գլուխը, ձեռքերն ու ոտքերը միաժամանակ հատակից բարձրացնել ու այդ դիրքում մնալ 5-7 րոպե: Պառկել մեջքի վրա այնպես, որ ոտքերի ու հատակի միջև ստացվի 45 աստիճան անկյուն, այս դիրքը պահպանել 3-5 րոպե, ապա կրկնել 4-6 անգամ:
