Բելգիայի մայրաքաղաք Բրյուսելում գտնվող Թուրքիայի գլխավոր հյուպատոսարանի հարևանությամբ մարտի 30-ին կռիվ և դանակահարություն է տեղի ունեցել:
Sputnik-ի թուրքական ծառայության համաձայն՝ միջադեպին մասնակցել է Թուրքիայի շուրջ 300 քաղաքացի, ովքեր կառավարման նախագահական կարգի վերաբերյալ հանրաքվեին մասնակցելու նպատակով եկել էին հյուպատոսարան: Բելգիայում բնակվող թուրք ընտրողների համար նախատեսված ընտրատեղամասը տեղակայված է եղել Բրյուսելում Թուրքիայի գլխավոր հյուպատոսարանում:
Մարտի 30-ին՝ Ժամը 16-ի սահմաններում հյուպատոսարանից շուրջ 100 մետր հեռավորության վրա ծագած մարդաշատ կռվի հետագա բարդացումը կանխվել է Բելգիայի ոստիկանության արագ միջամտության շնորհիվ: Մամուլում տեղ գտած տեղեկությունների համաձայն՝ միջադեպի ընթացքում Թուրքիայի իշխանություններին աջակցող քաղաքացիները դանակահարել են 4 քրդերի: Հիվանդանոց տեղափոխված վիրավորներից մեկի վիճակը, ով որովայնի շրջանում դանակի հարված էր ստացել, գնահատվում է ծայրահեղ ծանր:
Բրյուսելում Թուրքիայի գլխավոր հյուպատոսարանը դեպքի առթիվ հանդես է եկել հայտարարությամբ՝ շուտափույթ առողջություն մաղթելով վիրավորներին:
Աղբյուրի տեղեկացմամբ՝ միջադեպը որևէ կերպ չի խոչընդոտել քվեարկության ընթացքին, ինչը բարեհաջող ավարտին է հասցվել:
