Բանանով չհետաքրքրվող ՊԵԿ նախագահի ուշագրավ դիտարկումները

ՀՀ ԱԺ-ում նախորդ տարվա պետական բյուջեի  կատարողականը ներկայացնելուց հետո ՊԵԿ նախագահ Վարդան Հարությունյանը պատասխանել է լրագրողների հարցերին: Ներկայացնում ենք հարցուպատասխանն ամբողջությամբ:

ՊԵԿ—ում կադրային կրճատումներն ինչով են պայմանավորված:

Կառուցվածքային փոփոխություններ են, որոնց արդյունքում ձեւավորվել է նոր կառուցվածք, դրա արդյունքում  շուրջ 483 հաստիք կրճատվել է:

Այսինքն ՊԵԿ  աշխատակազմը ուռճացվա՞ծ էր:

Ես մեկ անգամ այդ հարցին պատասխանել եմ: Տարիների ընթացքում ՊԵԿ-ը վերազինվել է, եւ դա պետք է ուշ թե շուտ բերեր նման հանգուցալուծման: Այսօրվա տեխնոլոգիաների դարաշրջանում բնական է, որ մարդկային գործոնի առկայությունը ավելի քչանում է, եւ դրա արդյունքում ունենք այն ինչ ունենք:

Araratnews.am. Վերջերս ականատես եղանք, որ ՊԵԿ աշխատակիցներ են ձերբակալվում, կոռուպցիոն սկանդալներ են բացահայտվում: Սա չի՞ նշանակում, որ ոլորտը կոռումպացված է:

Սա պայքարի շրջանակներում եմ դիտում, եթե ինչ-որ մեկը իր աշխատանքի ընթացքում խախտում է  լիազորությունները, բնական է, որ պետք է ՀՀ գործող օրենսդրությամբ պատասխան տա:

Araratnews.am. Տեսակետ կա, որ միայն «փոքր ձկներին» են քավության նոխազ դարձնում:

Ես չգիտեմ «մանր ձուկ, խոշոր ձուկ» ասելով դուք ինչ նկատի ունեք:

Araratnews.am. Այսինքն այդ կաշառքը կիսում են վերեւների հետ:

Եթե ունենք նման ինֆորմացիա ունեք՝ խնդրում եմ տրամադրեք, եւ վստահեցնում եմ ձեզ, որ այդ մարդիկ եւս կկալանավորվեն:

Պարոն Հարությունյան հաջողվո՞ւմ է Ձեզ խոշոր գործարարներին ստվերից բերել հարկման դաշտ, որպեսզի արտոնյալներ եւ մենաշնորհային դիրք զբաղեցնողներ չլինեն:

Արտոնյալներ, մենաշնորհներ… ես կարող եմ ձեզ վստահեցնել, որ դա մեր ամենօրյա  գործն, է ունենք արդյունքներ, կարծում եմ բյուջեի կատարողականի ներկայացումից պարզ դարձավ, որ կան դրական արդյունքներ:

Քեթրին գրուպում կատարված ստուգումները դրա համատեսքստո՞ւմ էին:

Քեթրին գրուպը տնտեսվարող սուբյեկտ է, այնտեղ կարող են առաջանալ ցանկացած խնդիր այնպես, ինչպես ցանկացած տնտեսվարող սուբյեկտներում:

Ալեքս Տեքստիլում էլ ստուգումներ կլինե՞ն:

Այո, իհարկե:

Araratnews.am. Սերժ Սարգսյանին եւ նրա մերձավորներին պատկանող օբյեկտներում երբ ե՞ք ստուգումներ անելու:

Ես խնդրում եմ ցանկը տրամադրեք:

Եղել է մի խոշոր տնտեսվարող,  որին դուք ստուգել եք ձեր պաշտոնավարման ժամկետում, ով գործել է ստվերում եւ բերել եք հարկման դաշտ:

Դուք իմ գործունեությունը տեսել եք, եւ երբեւիցէ չեմ փորձել մեր ձեռբքբերումները հանրայնացնել, դրա համար թույլ տվեք այդ հարցին չպատասխանել:

Araratnews.am Պարոն Հարությունյան դուք պատկառելի ունեցվածք ունեք: Ինչ ճանապարհով ե՞ք այն կուտակել:

Մի մոռացեք, որ  ես մինչեւ 2016 թվականի հոկտեմբեր ամիսը աշխատել եմ բիզնեսնում. եթե անհաջողակ բիզնեսմեն լինեի պետք է ոչինչ չունենայի, իսկ հաջողակ բիզնեսմենը…:

Araratnews.am  Երկու առանձատուն, երեք բնակարան…

Կարող ա վեցը ունենայի:

Իսկ հիմա բիզնես չունե՞ք:

Ես չունեմ:

Araratnews.am Ձեր ընտանիքի անդամների անունով են փաստորեն գրանցված ձեր բիզնեսները:

Իմ ընտանիքի անդամներին են պատկանում:

Չկա՞ շահերի բախում:

Չէ, չկա:

Ով ինչ ցանկանում է  ներկրո՞ւմ է:

Այո, 100 տոկոս։ Բերեք մի փաստ, որ մարդ մի բան ուզում է բերել, եւ հարկային մարմինները խոչընդոտում են:

Այսինքն այնքան բաց են սահմանները, որ ադրբեջանական ապրանք են բերում:

Ադրբեջանական ապրանք բերելու փաստով մարդ դատվեց սիրելիս:

Շաքարավազ, բանան ով է ներկրում:

Շատերը, անուններ չեմ կարող ասել: Բանանը էդքան կարեւոր չէ ինձ համար:

Դուք Սերժ Սարգյանի՞, թե՞ Կարեն Կարապետյանի թիմից եք:

Դա նույն թիմն է:

Փայլակ Ֆահրադյան