ՀՀ Ազգային ժողովում այսօր հերթական նիստը տեղի չունեցավ: Խորհրդարան էր ներկայացել ընդամենը 17 պատգամավոր, մինչդեռ քվորում ապահովելու համար անհրաժեշտ էր 66 պատգամավորի ներկայություն:
Նիստը վարող ՀՀ ԱԺ փոխնախագահ Էդուարդ Շարմազանովը նկատեց. «Մեր շարքերը չեն նոսրանում, հուսով եմ՝ աստիճանաբար կվերադառնանք աշխատանքային հուն»: Նախօրեին գրանցվել էր 13 պատգամավոր:
Նա շնորհավորեց ՀՀԿ խմբակցության ղեկավար Վահրամ Բաղդասարյանին՝ տարածքային ցուցակով նորից պատգամավոր ընտրվելու առթիվ. «Նաեւ բոլոր իմ գործընկերներին, որոնք հասել են հաջողության եւ աշխատելու են նոր խորհրդարանում: Քանի որ պարոն Արզումանյանն ու Ռուբիկ Հակոբյանը երեկ դահլիճում չէին, բերեք այսօր նրանց հատուկ մի անգամ էլ ծափահարենք: Շնորհակալ եմ, կհանդիպենք ժամը 3-ին»:
Ի դեպ, սա արդեն երկրորդ քառօրյան է, որ տապալվում է քվորում չլինելու պատճառով:
