Սննդամթերքի անվտանգության տեսչական մարմնի նախկին պետ, միջազգային փորձագետ Գրիգոր Գրիգորյանն այսօր մամուլի ասուլիսում անդրադարձավ Հայաստանում գործող ամերիկյան լաբորատորիաներին: Նա ասաց, որ այդպիսի լաբորատորիաներ կան Վրաստանում, Ադրբեջանում եւ ԽՍՀՄ նախկին երկրներում:
Մամուլի ասուլիսում սննդամթերքի անվտանգության տեսչական մարմնի նախկին պետն անդրադարձավ 2017-ին Տավուշի մարզի Արծվաշեն գյուղում գրանցված տուլարեմիա հիվանդությանը, որով վարակվել էր 20 մարդ: «Ոչ ոք ուշադրություն չդարձրեց դեպքի հետագա ուսումնասիրությանը: Վարակվել էին տարբեր տարիքի գյուղացիներ: Այդ հիվանդությունը կարող է մարդուն անցնել կրծողներից, նաև ջրով եւ սննդով: Կրծողների մեջ տուլարեմիայի հարուցիչ չգտան: Ջրում եւ հողում եւս չգտան: Հետագայում ասացին՝ վարակն անցել է օդակաթիլային ճանապարհով»,- հիշեցրեց փորձագետը:
Հիշեցնենք, որ նախորդ տարի Տավուշի մարզի «Արծվաբերդի առողջության կենտրոն» պետական ձեռնարկության տնօրեն Գագիկ Դալլաքյանն ասել էր՝ տուլարեմիան Արծվաշենում տարածվել է ադրբեջանական թռչող սարքի միջոցով:
Գրիգոր Գրիգորյանի խոսքով՝ ժամանակին տուլարեմիան օգտագործվել է կենսաբանական զենք: Բանախոսը նաև պատմեց, որ Վրաստանում հիվանդություններ են հայտնվում, որոնք մեր տարածաշրջանում չկան: Օրինակներից մեկը դեղին տենդ տարածող մոծակներն են, որոնք մեր տարածաշրջանում հայտնվել են 60 տարի առաջ: Վրաստանում հայտնվել են նաև Ֆիլիպիններում տարածված ճանճեր, որոնք երբեք մեր տարածաշրջանում չեն եղել: Այդ ճանճերը հիվանդություն են տարածել Դաղստանում, Չեչնիայում, Թուրքիայում:
Մանրամասները՝ տեսանյութում:
Սոնա Դավթյան
