Հայաստանի Հանրապետության առողջապահության նախարար Արսեն Թորոսյանը կենտրոնական հավաքակայանում այսօր լրագրողների հետ զրույցում անդրադարձավ ֆեյսբուքյան իր գրառմանը՝ Հայաստանը ծխելուց զերծ երկիր: «Վնասակար բոլոր սովորույթներից պետք է զերծ մնալ՝ սկսած ծխախոտից, վնասակար սննդից: Պետք է բացառենք այդ սովորույթը երիտասարդների շրջանում»,- ասաց նախարարը:
Անդրադառնալով Ազգային անվտանգության ծառայության այն հայտարարությանը, ըստ որի՝ 40 զինակոչիկ ազատվել է զինծառայությունից, նախարարը հույս հայտնեց՝ սա խրատ կլինի բոլոր բժիշկներին, որոնք ներգրավված են ապօրինի գործընթացներում:
Գործադիր մարմնի անդամին վրդովել էր, որ անգամ հիմա, երբ կատաղի պայքարում են կոռուպցիայի դեմ, հայտնվում են բժիշկներ, որոնք անօրինական գործարքի մեջ են մտնում: «Կոչ եմ անում որեւէ բուժաշխատող նման գործընթացում չներգրավվի»,- ասաց Արսեն Թորոսյանը:
