Բնապահպանները ահազանգում են, որ Արմաշի լճերի քանակը կրճատվում է, ինչը իր հերթին բերում է կենսաբազմազանության կրճատման:
Այս մասին այսօր լրագրողների հետ զրույցում հայտնեցին բնապահանական ՀԿ-ների ներկայացուցիչները:
«Էկոլուր» ՀԿ-ի նախագահ Ինգա Զարաֆյանն ասաց, որ իրավիճակը բավականին ծանր է և Բնապահապանաության նախարարարությունը նույնպես անհանգստացած է Արմաշի լճերում կենսաբազմազանության և թռչունների պահպանման խնդրով:
«Արարատյան դաշտում կա ջրի կառավարման շատ ծանր խնդիր։ Այստեղ նաև շահագրգիռ կողմեր կան, և հիմա մենք չունենք պատասխաններ: Ջրային կոմիտեն նույնպես բացատրություն չի տվել»,-ասաց Զարաֆյանը:
«Թռչնասերների կենտրոն» ՀԿ-ի նախագահ Սիլվա Ադամյանն ասում է, որ Արմաշի լճերը արհեստական, ձկնաբուծական լճակներ են, որտեղ բնակվում են 100-ից ավել ջրաճահճային թռչուններ:
«Այդ լճերն ունեն սեփականատերեր: Հայաստանի համար սա միակ տարածքն է, որտեղ այդպիսի քանակությամբ ջրաճահճային թռչուններ կարելի է տեսնել: Մի քանի տարի առաջ, երբ մենք հանդիպել են սեփականատերերի հետ, մեզ ասում էին, որ կան խնդիրներˋ կապված ջրայի ռեսուսրների և ձկանբուծության հետ»,-ասում է Ադամյանը:
Նա հավելում է, որ այդտեղ թռչունների 20 տեսակ կա, որոնք գրանցված են Կարմիր գրքում:
Ըստ 2012-ի վերջին տվյալների՝ Արմաշում եղել է 18 մեծ լիճ և 5՝ փոքր:
«Վերջին օրերին, երբ մենք այցելեցինք այդ տարածք՝ տեսանք, որ պարզապես մի երեք լիճ չորացվել է: Այդ տարածքները չորացվում են, ցանքատարածությունների են վերածվում և աճեցվում ձմերուկ, գյուղատնտեսական մթերքներ: Դա նշանակում է, որ վերանում է այդտեղ նաև կենսաբազմազանությունը և այդ թռչունները այդտեղից կվերանան»,-ասաց Ադամյանը:
Նա ասաց, որ միակ լուծումն այն է, որ այդ լճերը Բնապահապանության նախարարարությունը պետք է վերցնի իր ենթակայության տակ, կամ պետք է որևէ դոնոր կազմակերպություն գնի և դարձնի այն հատուկ պահպանվող տարածք:
Հայաստանում ամերիկյան համալսարանի Յակոբեան բնապահպանական կենտրոնի ավագ գիտաշխատող Կարեն Աղաբաբյանն ասում է, որ խնդիրը առաջացել է ջրային ռեսուրսների սխալ կառավարումից:
«Արարատյան դաշտի արտեզյան ջրի ավազանը սպառվում է, առանց մոնիտորինգի աշխատել են այնտեղ ու հիմա այս խնդրի առջև են կանգնել»,-ասաց Աղաբաբյանը:
