Ազգային անվտանգության ծառայության տնօրեն Արթուր Վանեցյանի եւ Հատուկ քննչական ծառայության պետ Սասուն Խաչատրյանի հեռախոսազրույցի ձայնագրության մի հատվածը վերաբերում էր Ռոբերտ Քոչարյանին կալանավորած դատավոր Վաչե Մարգարյանին: Նա, ըստ ձայնագրության, զանգահարել է ԱԱԾ տնօրեն Արթուր Վանեցյանին և ասել՝ հիմքերը կնայի եւ ԱԱԾ տնօրենին կզեկուցի:
Ձայնագրության այդ մասը լսելուց հետո իրավաբաններից ոմանք հայտարարեցին՝ դատավոր Վաչե Մարգարյանը չպետք է շարունակի պաշտոնավարել:
Դատավորների գործունեությունը հսկում է Բարձրագույն դատական խորհուրդը (ԲԴԽ), որն իրավասու է կարգապահական վարույթ հարուցելու:
Araratnews.am-ը կապ հաստատեց Դատական դեպարտամենտի մամուլի քարտուղար Արման Խաչատրյանի հետ՝ տեղեկանալու, թե ԲԴԽ-ն ձայնագրության հիման վրա ի՛նչ քայլեր է ձեռնարկելու: Ի պատասխան Արման Խաչատրյանն ասաց. «ԲԴԽ-ը կարող է կարգապահական պատասխանատվության ենթարկել դատավորին, եթե ունի դատավորների ընդհանուր ժողովի կարգապահական հանձնաժողովի կամ լիազոր մարմնի՝ դատավորին կարգապահական պատասխանատվության ենթարկելու միջնորդություն: Դրանից հետո կքննի միջնորդությունը եւ որոշում կկայացնի»:
Լիազոր մարմինը, Արման Խաչատրյանի տեղեկացմամբ, արդարադատության նախարարությունն է, որը դեռ տեղի ունեցածի մասին իր տեսակետը չի հայտնել: Մեզ հասած տեղեկություններով՝ այսօր արդարադատության նախարարությունը հայտարարությամբ հանդես կգա տեղի ունեցածի մասին:
Արման Խաչատրյանը նաև տեղեկացրեց, որ երեկ երեկոյան ԲԴԽ-ն հայտարարություն էր տարածել, ըստ որի՝ իրավասու մարմինները օրենքով սահմանված կարգով բացահայտեն տեղի ունեցածի բոլոր հանգամանքները և անեն իրավաչափ եզրահանգում, որի շահառուներն են մեր պետությունն ու հասարակությունը:
Սոնա Դավթյան
