Նրանք, ովքեր կփորձեն ինքնահաստատվել, կարժանանան ոստիկանության շատ կոշտ, օրենքի սահմաններում հակահարվածին։ Այս մասին լրագրողների հետ զրույցում այսօր ասաց ՀՀ ոստիկանապետ Վալերիյ Օսիպյանը։
«Կարծում եմ՝ վերջին շրջանում ոստիկանությունը գերազանց է կատարում իր պարտականությունները», — ասաց Օսիպյանը։
Անդրադառնալով «Ադեկվատ» խմբի և«ՎԵՏՕ» շարժման սևազգեստ ցուցարարներին բերման ենթարկելուն՝ ոստիկանապետն ասաց, որ նշված անձանց բերման ենթարկելն ամենևին կապ չունի հագուստի գույնի հետ։
«Ոստիկանությունն առաջնորդվում է բացառապես օրենքներով։ Ինչ էլ արել ենք, արել ենք օրենքի սահմաններում։ Եթե մենք հանցանք կատարած անձին բերման ենք ենթարկում բաժին, դա նշանակում է՝ որևէ մեկին բերման չպե՞տք է ենթարկենք։ Ո՛չ, բերման ենք ենթարկել և բերման ենք ենթարկելու բոլոր նրանց, ովքեր փորձելու են Հայաստանի Հանրապետությունում կարգը խախտել», — շեշտեց ոստիկանապետը։
