Քիմիկոս, «Նաիրիտ» գործարանի նախկին աշխատակից Հրաչիկ Միրզոյանն այսօր լրագրողների հետ զրույցում անդրադարձավ «Նաիրիտ» գործարանում բռնկված հրդեհին: Նրա խոսքով՝ թերայրման հետեւանքով պետք է առաջանար շմոլ գազ՝ ածխածնի օքսիդ, բայց բնապահպանության նախարարության համապատասխան կառույցը անալիզ չի արել՝ պարզելու, թե շմոլ գազ արտանետվե՞լ է մթնոլորտ, թե՞ ոչ:
Մյուս խնդիրը, որի մասին խոսեց քիմիկոսը, հրդեհի պատճառ դարձած լաք էթինոլ նյութն է: Մասնագետի վերլուծությամբ՝ լաք էթինոլ նյութը ճիշտ ձեւով չի պահպանվել, հրդեհն արգելակող նյութերի քանակը համապատասխան քանակով չի եղել, որի պատճառով հրդեհ է եղել:
«Ելք» դաշինքի պատգամավոր Լենա Նազարյանն էլ անդրադարձավ առողջապահության նախարարության հայտարարությանը: Այն, Լենա Նազարյանի խոսքով, տարօրինակ էր, քանի որ նախարարությունը հայտարարություն արեց հրդեհից մի քանի ժամ հետո, մինչդեռ մարդկանց պետք էր ասել, թե նրանք ինչ պետք է անեին նման իրավիճակում:
Պատգամավորը հիշեցրեց, որ տարիներ առաջ նույնպես հրդեհ էր եղել գործարանում, եւ պետք էր լուրջ վերաբերվել անվտանգությանը, իսկ անվտանգությունը գործարանում չի պահպանվել, որի պատճառով հրդեհ է եղել: «ԱԻՆ-ը պետք է ապահովեր կիսաքանդ գործարանի անվտանգությունը»,- նկատեց պատգամավորը:
Մեդիափորձագետ Սամվել Մարտիրոսյանն էլ ասաց, որ քիմիայի տերմիններով հանրության հետ շփվելու ժոնգլյորությունը ճիշտ տարբերակ չէ «Ասում են` ազոտի երկօքսիդը բարձրացել է, բայց քանի՞ մարդ գիտի, թե ինչ է ազոտի երկօքսիդը: Պետք է բնակչությանն ասեին, թե ինչ վտանգներ կան, եւ ինչ պետք է անել: Չպետք է ասեին, որ ծուխը գնում է Թուրքիա: Պետք է ասեին` ո՛ր գյուղերն էին ծխի շառավղի մեջ, քամին ի՛նչ ուժգնությամբ էր առաջ շարժվում»:
Araratnews.am-ը «Ելք» դաշինքի պատգամավոր Լենա Նազարյանից հետաքրքրվեց, թե ի՛նչ քայլեր պետք է ձեռնարկել՝ հրդեհի իրական պատճառի բացահայտմանը հասնելու համար, արդյոք իշխանությունը հետամուտ կլինի՞ սրա բացահայտմանը, եթե վարկած կա, որ այս ամենը կազմակերպված է եղել: «Դավադրական վարկածների մասին չեմ ուզում խոսել: Դա իրավապահ մարմինների խնդիրն է: Արձանագրենք մի կարեւոր հանգամանք. եթե անգամ ԱԻՆ-ը հրդեհի մարման ժամանակ լավ է աշխատել, ապա հիշելով 2009 թվականի հրդեհը «Նաիրիտ» գործարանում, ապա ԱԻՆ-ը պետք է պահպաներ գործարանի անվտանգությունը: Դեռ «Խոսրովի արգելոցի» հրդեհից հետո դիմել էի Ազգային ժողովի բնապահպանության հանձնաժողովի նախագահ Վարդեւան Գրիգորյանին եւ առաջարկել խորհրդարանական լսումներ կազմակերպել «Խոսրովի արգելոցի» հրդեհի պատճառների ու հետագա քայլերի մասին: Եթե լսումներ անցկացնելու որոշում կայացվի, դա լավ հնարավորություն է նաև անդրադառնալու «Նաիրիտ» գործարանի հրդեհին»,- ասաց օրենսդիր մարմնի անդամը:
ՍՈՆԱ ԴԱՎԹՅԱՆ
