Araratnews.am-ը տեղեկացրել էր զինված խմբի ղեկավար Արթուր Վարդանյանին գրավով ազատ արձակելու մասին:
Araratnews.am-ը կապ հաստատեց Արթուր Վարդանյանի փաստաբան Լեւոն Բաղդասարյանի հետ՝ տեղեկանալու փաստաբանի հետագա գործողությունների մասին:
Լեւոն Բաղդասարյանի կարծիքով՝ այս քրեական գործը հեռանկար չունի: «Շատ տարօրինակ է, որ մեղադրող կողմը մինչեւ հիմա ոչ մի գործողություն չի կատարում, որովհետեւ, ինչպես գիտեք, այս քրեական գործը «կարվեց» իմ պաշտպանյալի եւ մնացածների վրա նախկին իշխանության օրոք: Հեղափոխությունից հետո այն պետք է հեռանկար չունենար: Ինչեւիցե, դատարանը հետագայում դրան կանդրադառնա»,- մանրամասնեց փաստաբանը:
Եթե մեղադրող կողմը պնդի մեղադրանքը, Արթուր Վարդանյանի փաստաբանը իր պաշտպանյալին արդարացնելու պահանջ կներկայացնի: «Կարծում եմ, որ այն մեղսագրվում է իմ պաշտպանյալին, իրավաչափ չէ»,- ասաց Վարդանյանի պաշտպանը:
Եթե դատարանն այսօր չբավարարեր Լեւոն Բաղդասարյանի՝ Արթուր Վարդանյանին գրավով ազատելու միջնորդությունը, ապա նա կդիմեր ՄԻԵԴ, քանի որ Արթուր Վարդանյանը ոչ թե կալանք էր կրում, այլ պատիժ:
Ինչո՞վ է զբաղվելու Արթուր Վարդանյանը, ի՞նչ ծրագրեր ունի: Լեւոն Բաղդասարյանի խոսքով՝ իր պաշտպանյալն առողջական խնդիրներ ունի, ուստի նախ պետք է բուժվի:
Հիշեցնենք՝ Արթուր Վարդանյանի գլխավորած՝ 2015 թվականին Նորք-Մարաշում վնասազերծված 20 հոգանոց զինված խումբը ծրագրել էր բռնությամբ զավթել իշխանությունը: Մասնավորապես, թռիչքի պահին խոցել նախագահի օդանավը, հարձակում գործել ՀՀ նախագահի նստավայրի, Ազգային ժողովի, Սահմանադրական դատարանի, Կառավարության, Հանրային հեռուստաընկերության եւ այլ հաստատությունների շենքերի վրա: Գործով ամբաստանյալի կարգավիճակում են պաշտպանության նախկին փոխնախարար Վահան Շիրխանյանը, Գյումրու կաթոլիկ եկեղեցու քահանա Անտոն Դիկրան Թոթոնջյանը և ևս 17 անձ։
Սոնա Դավթյան
