ՀՀ կառավարությունն այսօրվա նիստին հավանության արժանացրեց ՀՀ արդարադատության նախարարությանը ՀՀ պետական բյուջեի պահուստային ֆոնդից 33 միլիոն դրամ հատկացնելու մասին որոշման նախագիծը: Գումարը նախատեսված է Հայաստանի Հանրապետության Սահմանադրությունը 100000 օրինակով հրապարակելու նպատակով:
Նախագիծը ներկայացրեց ՀՀ արդարադատության նախարար Արփինե Հովհաննիսյանը: Վարչապետ Հովիկ Աբրահամյանն էլ տեղեկացրեց` Սահմանադրության օրինակները բաժանվելու են պետական հիմնարկներին:
Հիշեցնենք, որ սահմանադրական փոփոխությունների հանրաքվեից առաջ ՀՀ տարբեր բնակավայրերում քաղաքացիները բողոքում էին, թե հնարավորություն չունեն Սահմանադրության տեքստին ծանոթանալու, իսկ իշխանության ներկայացուցիչները հորդորում էին օգտվել համացանցից: Պարզվում է` հանրաքվեի անցկացումից հետո միայն Գործադիրը նպատակահարմար գտավ տպել օրինակներ ու բաժանել` այն էլ պետական հիմնարկներին:
