2020 թվականի ՀՀ պետական բյուջեի միջոցներով հիմնովին կնորոգվի և կվերակռուցվի 8 միջին մասնագիտական ուսումնական հաստատություն և 22 մարզային հանրակրթական դպրոց: Այս մասին Ազգային ժողովում գալիք տարվա բյուջեի քննարկման ժամանակ տեղեկացրել է կրթության, գիտության, մշակույթի և սպորտի նախարար Արայիկ Հարությունյանը:
Նախարարը նաև հրապարակել է դպրոցների ցանկը, որտեղ 2020 թվականին կապիտալ շինարարական աշխատանքներ են կատարվելու: Այդ դպրոցներն են`
ՀՀ Արարատի մարզ — Դեղձուտի միջնակարգ դպրոցը
ՀՀ Արմավիրի մարզ — Արգինայի միջնակարգ դպրոցը
ՀՀ Գեղարքունիքի մարզ -Լեռնահովիտի միջնակարգ դպրոցը, Շատջրեքի միջնակարգ դպրոցը, Ջիլի միջնակարգ դպրոցը
ՀՀ Լոռու մարզ — Մեդովկայի միջնակարգ դպրոցը, Հագվու միջնակարգ դպրոցը
ՀՀ Շիրակի մարզ — Արեգնադեմի միջնակարգ դպրոցը, Բերդաշենի միջնակարգ դպրոցը, Կապսի միջնակարգ դպրոցը
ՀՀ Սյունիքի մարզ — Հարժիսի միջնակարգ դպրոցը, Դարբասի միջնակարգ դպրոցը, Կապանի թիվ 4 միջնակարգ դպրոցը
ՀՀ Տավուշի մարզ — Կիրանցի միջնակարգ դպրոցը, Դովեղի միջնակարգ դպրոցը
ՀՀ Վայոց ձորի մարզ — Գոմքի միջնակարգ դպրոցը, Չիվայի միջնակարգ դպրոցը, Եղեգիսի միջնակարգ դպրոցը
ՀՀ Կոտայքի մարզ — Ջրառատի միջնակարգ դպրոցը, Կաթնաղբյուրի միջնակարգ դպրոցը
ՀՀ Արագածոտնի մարզ — Լուսակնի միջնակարգ դպրոցը, Գառնահովիտի միջնակարգ դպրոց
Նախարարը նաև տեղեկացրել է, որ 2019 թ. ՀՀ պետական բյուջեի հավելյալ մուտքերից 2,5 մլրդ դրամ է հատկացվել կրթության, գիտության, մշակույթի և սպորտի ոլորտներին, որի շրջանակում կատարվել են նախագծային աշխատանքներ: Կատարված նախագծերի իրագործումը կպահանջի շուրջ 28 մլրդ դրամ: Եթե հետագայում պետությունը հատկացնի նոր միջոցներ, դրանք կիրագործվեն:
Ռոբոտիկայի լաբորատորիաների համար 2018 թվականին լրացուցիչ գումարներ են հատկացվել` մոտ 800 մլն դրամ: Մինչև 2019 թվականի տարեվերջ դպրոցների 50 տոկոսն ապահովված կլինի «Արմաթ» լաբորատորիաներով, որոնցում աշխատող մասնագետների աշխատավարձի համար պահանջվող գումարները նախատեսված են 2020 թ. պետական բյուջեում:
Նախարարը նաև տեղեկացրել է, որ 2020 թվականին Հայաստանում կանցկացվի կենսաբանության միջազգային օլիմպիադան, որի կազմակերպման համար բազմաթիվ նոր լաբորատորիաներ են ձեռք բերվելու, որոնք հետագայում կտրամադրվեն հանրակրթական դպրոցներին:
Ընդհանուր առմամբ 2020 թվականի պետական բյուջեի նախագծում կրթության, գիտության, մշակույթի և սպորտի նախարարության համար նախատեսված է 21 ծրագիր, 176 միջոցառում, որոնց իրականացման համար առաջարկվում է հատկացնել 179 մլրդ 459 մլն դրամ: 2019 թվականի համեմատ գալիք տարվա հատկացումներն ավելացել են 20 մլրդ 572 մլն դրամով կամ 12,9 տոկոսով:
