Հանրահայտ Lonely Planet ճանապարհորդական ուղեցույցը հրապարակել է այն 10-ը երկրների ցուցակը, ուր անհրաժեշտ է այցելել 2014 թվականին։
Ցուցակը գլխավորում է Բրազիլիան։ Հիմնավորման մեջ ասվում է, որ 2014-ին Բրազիլիայում տեղի է ունենալու Ֆուտբոլի աշխարհի առաջնությունը, երկիրը նախապատրաստվում է 2016 թվականի Ամառային օլիմպիական խաղերին, Բրազիլիան շարունակում է մնալ ամենագեղեցիկ ափերն ու մերձարևադարձային անտառներն ունեցող երկրներից մեկը։
Երկրորդ տեղում Անտարկտիկան է։ Ըստ Lonely Planet-ի, այցելությունն Անտարկտիկա կդառնա «ամբողջ կյանքի ամենաարկածային ճամփորդությունը»։ «Միացրե՛ք վայրի բնության մասին ցանկացած հեռուստաալիք, և դուք կզարմանաք հսկայական սառցաբեկորներից, չբացահայտված գագաթներից, պոկվող սառցաբեկորներից»։ Այս տարի լրանում է Անտարկտիկան անցնելու Էռնեստ Շեքլթոնի հանրահայտ փորձի հարյուրամյակը։ 2014-ին հնարավորություն կստեղծվի անձամբ կատարել այդ արկածային ճանապարհորդությունը։
Երրորդ տեղում Շոտլանդիան է։ Lonely Planet-ը Շոտլանդիան ընդգրկել է 2014 թվականի զբոսաշրջային ամենագրավիչ ուղղությունների եռյակում, քանի որ այդ տարի նախատեսված են բազմաթիվ փառատոններ, համերգներ և մարզական միջոցառումներ։ Շոտլանդիայում կանցկացվեն Ազգերի համադաշնության խաղերը, գոլֆի միջազգային մրցաշարը։ Բացի այդ, 2014-ը Շոտլանդիայում հռչակվել է «վերադարձի տարի»։
Տասնյակն ունի հետևյալ տեսքը։
1. Բրազիլիա
2. Անտարկտիկա
3. Շոտլանդիա
4. Շվեդիա
5. Մալավի
6. Մեքսիկա
7. Սեյշելյան կղզիներ
8. Բելգիա
9. Մակեդոնիա
10. Մալայզիա
