Երեկ մի խումբ ակտիվիստներ հավաքվել էին ՀՀ ազգային անվտանգության ծառայության շենքի դիմաց, որտեղ պահվում է «Ցեղակրոն» կուսակցության ղեկավար, նոյեմբերի 5-ի իրադարձությունների արդյունքում կալանավորված Շանթ Հարությունյանը: Ակտիվիստները հայտարարել են, որ այդտեղ են եկել ցույց տալու, որ իրենք «Շանթի հետ են»: «Բոլոր նրանք, ովքեր Շանթին գիժ են համարում, մենք նրանց ենք գիժ համարում, որովհետև Շանթն, ըստ մեզ, խենթ է, ով ուղղակի իր կյանքը նվիրել է իր հայրենիքին»,- ասել է ակտիվիստներից Վահան Հարությունյանը: ԱԱՇ շենքի առջև է եղել նաև Շանթ Հարությունյանի որդին Շահեն Հարությունյանը: Նա ասել է, որ ինքը դիմում է գրել քննիչին՝ հորը տեսնելու համար, սակայն մինչ այժմ որևէ պատասխան չի ստացել: Շահեն Հարությունյանի խոսքով ընտանիքը որևէ տեղեկություն չունի Շանթ Հարությունյանից. «Ուզում եմ հետաքրքրվել նրա առողջական վիճակի մասին: Պապայի համար եմ պայքարում: Ինքը հոգեկան խնդիրներ չունի»,- ասել է Շահենը: Հիշեցնենք, որ Շանթ Հարությունյանի նկատմամբ նշանակվել է դատահոգեբուժական փորձաքննություն, սակայն դեռ հայտնի չէ, թե երբ է նա տեղափոխվելու հիվանդանոց:
