Araratnews.am-ը զրուցել է «Իրականացրու Երազանք» ՀԿ-ի հիմնադիր Էդգար Խաչատրյանի հետ:
Պարոն Խաչատրյան, կոնկրետ ինչո՞վ է զբաղվում Ձեր ՀԿ-ն:
ՀԿ-ի հիմնական գաղափարը երեխաների երազանքներ իրականացնելն է։ Մենք ստանում ենք երեխաների երազանքներով նամակներ, իսկ ՀԿ-ն տարբեր միջոցառումների միջոցով հավաքագրում է գումար, հագուստ, խաղալիքներ և դրանք տրամադրում է մեր շահառու երեխաներին։
Դուք բավականին ակտիվ ֆեյսբուքյան օգտատեր եք, մենք նկատեցինք, որ սոցիալական կայքում մրցույթ եք հայտարարել՝ նախատեսված հատուկ գանգրահեր, ինչպես Դուք եք ասում՝ խուճուճ մազերով աղջիկների համար: Կմանրամասնեք, թե ի՞նչ մրցույթի մասին է խոսքը:
Շնորհակալ եմ մրցույթին ուշադրություն դարձնելու համար։ Մրցանակաբաշխության գաղափար մինչ երեկ չկար, ու շատ պատահական որոշեցի սկսել #ԽուճուճChallenge-ը, երբ ընկերներիցս մեկն ինձ ուղարկեց մի գանգրահեր աղջնակի նկար։
Որքա՞ն է տեւելու մրցույթը, ինչպե՞ս է իրականացվելու ընտրությունը եւ ի՞նչ մրցանակ է նախատեսված հաղթողի համար:
Մինչև հոկտեմբերի 10-ը կհավաքագրենք նկարները, այնուհետև կտեղադրեմ հենց իմ էջում, ամենաշատ հավանում ունեցող նկարների տիրուհիների առաջին եռյակը կստանա անակնկալ մրցանակ։ Թույլ տվեք մրցանակների մասին առայժմ չբարձրաձայնել։ Հավանումներ հավաքելու համար կտրվի մեկ ամիս։
Արդյո՞ք այս մրցույթը որեւէ կերպ կապ է ունենալու Ձեր բարեգործական գործունեության հետ:
Այս պահին նախատեսված չէ այս մրցույթը կապել «Իրականացրու Երազանքի» հետ։ Հետագայում, եթե մրցույթը շարունակական բնույթ կրի և հովանավորչական փաթեթ ձեռք բերենք, գուցե նոր խորագիր ձևավորենք՝ «Խուճուճները հանուն բարության»։ Ամեն ինչ կախված է առաջին փորձից։
