Կառավարության վաղվա նիստի օրակարգում ընդգրկված է օրենսդրական փոփոխությունների մի փաթեթ, որի ընդունումով առավել կհեշտանա Հայաստանում օտարերկրացիներին մշտական կացության կարգավիճակ տրամադրելը: Մասնավորապես` առաջարկվում է սահմանել օտարերկրացուն մշտական կացության կարգավիճակ տրամադրելու նոր հիմք, այն է` օտարերկրացուն տրամադրել մշտական կացության կարգավիճակ, եթե օտարերկրացին էսքրոու հաշվի միջոցով և նոտարի կողմից վավերացված գործարքով ձեռք է բերել առնվազն 40 միլիոն Հայաստանի Հանրապետության դրամ արժեքով անշարժ գույք:
«Հաշվի առնելով, որ առաջարկվող փոփոխությունների նպատակն օտարերկրացիների կողմից Հայաստանի Հանրապետությունում մշտական կացության կարգավիճակ ձեռք բերելը հեշտացնելն ու խրախուսելն է, առաջարկվում է նաև լրացվող նոր հիմքով մշտական կացության կարգավիճակ տրամադրել 10 տարի ժամկետով՝ գործող այլ հիմքերի համար նախատեսված 5 տարի ժամկետի փոխարեն: Բացի այդ, առաջարկվում է առնվազն 40 միլիոն Հայաստանի Հանրապետության դրամ արժեքով անշարժ գույք ձեռք բերելու հիմքով մշտական կացության կարգավիճակ տալու կամ մերժելու մասին որոշումը կայացնել դիմումը ներկայացնելու օրվանից 15-օրյա ժամկետում»,- ասված է նախագծի հիմնավորման մեջ:
Ավելին, առաջարկվում է առնվազն 40 միլիոն դրամ արժեքով անշարժ գույք ձեռք բերելու դեպքում օտարերկրացուն ազատել պետական տուրքի վճարումից:
«Ներկայացված նախագծերը մշակելիս ուսումնասիրվել է նաև այդ ոլորտում միջազգային փորձը: Արդյունքում պարզ դարձավ, որ մի շարք երկներում նշված համակարգը ներկայումս հաջողությամբ և արդյունավետորեն կիրառվում է»,- ասվում է նախագծի հիմնավորման մեջ:
