ԱՄՆ նախագահ Բարաք Օբաման պատասխանել է Պենտագոնի նախկին ղեկավար Ռոբերտ Գեյթսին, ով իր հուշերի գրքում քննադատության է ենթարկել Սպիտակ տան գործող ղեկավարին՝ Աֆղանստանում և Իրաքում վարվող քաղաքականության համար։ Օբամայի անհամաձայնության մասին պատմել է Սպիտակ տան պաշտոնական ներկայացուցիչ Քեյթլի Հեյդենը։
«Նախագահը երախտապարտ է Ռոբերտ Գեյթսին՝ պաշտպանության նախարարի պաշտոնում աշխատելու և երկրին ծառայելու համար։ Աֆղանստանում մեր քաղաքականության վերաբերյալ քննարկումների մասին հաղորդվում էր տարիներ շարունակ, և լավ հայտնի է, որ երկրի ղեկավարը մտադիր է հասնել «Ալ-Կաիդայի» ոչնչացմանը և միաժամանակ մարտական գործողությունների դադարեցմանը, որոնք ավարտվելու են այս տարի»,- ասել է Հեյդենը։ Վերջինս նշել է, որ Օբաման ողջունում է անվտանգության ոլորտում իր օգնականների բազմակարծությունը, ինչը հնարավորություն է տալիս ամապնդել ամերիկյան քաղաքականությունը։
Սակայն Հեյդենն ասել է, որ Օբաման համաձայն չէ Գեյթսի այն գնահատականների հետ, որոնք վերաբերում են Իրաքում պատերազմի դադարեցմանը։ Օբաման նաև պաշտպանել է փոխնախագահ Ջոզեֆ Բայդենին, ով, ըստ նախագահի, «օգնում է ամրապնդել ԱՄՆ-ի առաջատար դիրքերն աշխարհում»։
Ռոբերտ Գեյթսի գիրքը լույս է տեսնելու հունվարի 14-ին, որի որոշ հատվածներ արդեն հայտնվել են մամուլում։
