ՀՀ դատախազությունը երեկ տեղեկացրել է՝ Պողոս Պողոսյանի մահվան փաստի առթիվ հարուցված քրեական գործով նոր ի հայտ եկած հանգամանքների հետևանքով ՀՀ քրեական օրենսգրքի 104-րդ հոդվածի 2-րդ մասի 7-րդ և 10-րդ կետերով նախատեսված առերևույթ հանցագործության հատկանիշներով, Երևան քաղաքի դատախազությունում հարուցվել է վարույթ:
Հիշեցնենք՝ Պողոս Պողոսյանը սպանվել է 2001 թվականին՝ «Առագաստ» սրճարանում։ Նա սպանվել է այդ պահին գործող նախագահ Ռոբերտ Քոչարյանի թիկնապահների կողմից ծեծի ենթարկվելու պատճառով: Ականատեսների վկայությամբ՝ ծեծի պատճառը Պողոսյանի կողմից նախագահին ուղղված ողջույնի անհարգալից ձևն էր: Չնայած նրան, որ, որոշ վկաների պնդմամբ, ծեծին մասնկացել են մի քանի հոգի, Քոչարյանի թիկնազորի միայն մեկ անդամին՝ Կուկու մականունով հայտնի Աղամալ Հարությունյանին դատարանը դատապարտեց 1,5 տարվա պայմանական ազատազրկման:
Araratnews.am-ը Ռոբերտ Քոչարյանի փաստաբաններ Արամ Օրբելյանին եւ Հայկ Ալումյանին հարցրեց՝ հնարավո՞ր է Ռոբերտ Քոչարյանը ներգրավվի սույն գործում: «Ես Պողոս Պողոսյանի գործին ընդհանրապես չեմ առնչվել, գործից տեղյակ չեմ, բացի այն ինֆորմացիայից, որը կա լրատվամիջոցներում»,- պատասխանեց Հայկ Ալումյանը:
Փաստաբանը դժվարացավ ասել, թե ինչ կերպով Պողոս Պողոսյանի սպանությունը կկապվի Ռոբերտ Քոչարյանի հետ:
Արամ Օրբելյանը ևս մեզ հետ զրույցում նշեց, որ ծանոթ չէ Պողոսյանի սպանության դեպքին, հետևաբար չցանկացավ որեւէ ենթադրություն անել:
Փաստաբանները հավաստիացրին՝ Պողոս Պողոսյանի գործի, դրա վերաբացման վերաբերյալ քննարկում չեն ունեցել իրենց պաշտպանյալ Ռոբերտ Քոչարյանի հետ:
Սոնա Դավթյան
