Այսօր Ազգային Ժողովում ոչ իշխանական քառյակը բոյկոտեց նիստը և չգրանցվեց, որի հետևանքով նիստի քվորումը հետաձգվեց 20 րոպեով, մինչեւ խորհրդարան ժամանեցին ուշացած հանրապետական պատգամավորները:
Այս առիթով լրագրողները հետաքրքրվեցին ՀՅԴ պատգամավոր Աղվան Վարդանյանից, թե ինչու քառյակը բոյկոտեց նիստը:
Աղվան Վարդանյանն ասաց, որ սա քաղաքական պայքար է, կա ընդդիմություն, կա իշխանություն և ամեն մեկը իր գործիքակազմից է օգտվում:
«Հիմնական պատճառը, փաստորեն, այն է, որ երեկ նիստի սկզբնամասում Կառավարությունը բերել է կուտակային կենսաթոշակների մասին օրենքը նոր խմբագրությամբ, որտեղ մեզ համար անընդունելի բազմաթիվ դրույթներ կային: Այս առումով անհասկանալի է. յուրաքանչյուր օրենք պետք է առնվազն 15 օր հրապարակային լինի, այսինքն պետք է 15 օր առաջ այս օրենքի նախագիծը դրվեր Կառավարության կայքէջում: Նախ կառավարությունը իր ծրագրի ներկայացման ժամանակ ասաց, որ քննարկումներ կկազմակերպի քաղաքական ուժերի հետ, եւ այնպիսի մոդել կընդունվի, որ ընդունելի կլինի հանրության մեծ մասի համար: Կառավարությունը չի կատարել իր խոստումը: Կառավարությունը ընդդիմությունից խնդրել էր նաև, որ մարդիկ տրամադրեն, մասնագետներ, որ ստեղծեն միասին աշխատանքային խումբ՝ այդ մոդելը մշակելու համար: Մենք, իբրև պատասխանատու քաղաքական ուժ՝ 4 հոգի էինք ներկայացրել, բայց չձևավորվեց քննարկում, չեղավ որեւէ աշխատանք և Կառավարությունը պարզապես հրավիրեց ու տեղեկացրեց իրենց պատրաստի մոդելի մասին»,- պարզաբանեց Վարդանյանը:
