ՀՀ վարչապետ Նիկոլ Փաշինյանն այսօր չի բացառել, որ կորոնավիրուսի հետ կապված իրավիճակի հետագա վատթարացման դեպքում կառավարությունը ստիպված կլինի վերադառնալ խիստ սահմանափակումներին եւ նույնիսկ՝ ավելի խստացնել դրանք:
Պարետատան նիստից հետո կայացած ճեպազրույցում վարչապետն ասել է, որ «իրավիճակը շարունակում է մնալ ծանր»:
«Մեր ռազմավարությունը շարունակում է մնալ նույնը`իրավիճակը կարելի է բարելավել միայն քաղաքացիների անհատական վարքագծի փոփոխության եւ կառավարության հետ համագործակցության արդյունքում: Միայն վարչական մեթոդները չեն կարող արդյունք տալ՝ առանց քաղաքացիների անհատական վարքագծի զանգվածային փոփոխության», — ասել է Նիկոլ Փաշինյանը:
Վարչապետի կարծիքով, «շատ քաղաքացիներ չեն հավատում իրենց անհատական վարքագծի ազդեցությանը ընդհանուր իրավիճակի վրա»:
Նիկոլ Փաշինյանն ասել է, որ կորոնավիրուսի հետ կապված իրավիճակի հետագա վատթարացման դեպքում կառավարությունը ստիպված կլինի վերադառնալ խիստ սահմանափակումներին եւ նույնիսկ՝ ավելի խստացնել դրանք:
