Ցուկերբերգը պատասխանել է սոցցանցերը փակելու Թրամփի սպառնալիքներին

Facebook ընկերության ղեկավար Մարկ Ցուկերբերգը դեմ է հանդես եկել սոցցանցերի գործունեության նկատմամբ ԱՄՆ իշխանությունների վերահսկողության խստացմանը։ Այս մասին նա ասել է FoxNews-ի հետ հարցազրույցում։

Ցուկերբերգի կարծիքով՝ նման միջոցառումները կհանգեցնեն գրաքննության։

«Ընդհանուր առմամբ որևէ հարթակ գրաքննության ենթարկելու իշխանությունների որոշումն ինձ չի թվում ճիշտ արձագանք»,-ասել է Ցուկերբերգը։

Նրա խոսքով՝ սոցցանցերի ղեկավարությունները քննադատության են ենթարկվում ինչպես որոշ նյութերի արգելափակման, այնպես էլ դա չանելու համար։

Երեկ հայտնի էր դարձել, որ ԱՄՆ նախագահ Դոնալդ Թրամփը մտադիր է իրականացնել սոցցանցերի պետկարգավորում։ Նա թվիթերյան իր էջում գրել էր, որ կփակի դրանք, եթե հետագայում էլ պահպանողականների ձայնը խլացվի։

Նախագահի վրդովմունքն է առաջացրել այն, որ օրեր առաջ Twitter-ը նրա մի քանի գրառումներին կցել էր անճշտության նշան։

Ցուկերբերգն այդ ժամանակ դատապարտել էր սոցցանցի գործողությունը։