Ուկրաինայի նախկին վարչապետ Յուլիա Տիմոշենկոն երկրում տեղի ունեցած վերջին զարգացումները որակում է որպես հեղաշրջում` այն նմանեցնելով 1991 թվականին ԽՍՀՄ-ում տեղի ունեցած «պուտչի» հետ:
Տիմոշենկոյի խոսքերը փոխանցել է նրա պաշտպան Սերգեյ Վլասենկոն: Նրա խոսքերով` Տիմոշենկոն նաև կոչ է արել նախագահ Վիկտոր Յանուկովիչին հավաքել ազգային անվտանգության խորհուրդը և հայտարարել ԵՄ հետ ասոցացման մասին համաձայնագրի ստորագրման մասին:
«Նա կոչ է արել բոլորին դուրս գալ և իրենց քաղաքացիական դիրքորոշումն արտահայտել Ուկրաինայի բոլոր քաղաքների մայդաններում»,- ասել է նախկին վարչապետի պաշտպանը` փոխանցելով Տիմոշենկոյի խոսքերը:
Հիշեցնենք, որ երեկ Ուկրաինայի կառավարությունը ԵՄ հետ Ասոցացման պայմանագրի ստորագրման գործընթացի դադարեցման որոշում է կայացրել, ինչը պայմանավորված է Ռուսաստանի և ԱՊՀ երկրների հետ ավելի սերտ հարաբերություններ հաստատելու անհրաժեշտությամբ։
