Վարչապետ Տիգրան Սարգսյանը շաբաթ օրը ՀՀԿ տնտեսական համաժողովում մի այնպիսի ելույթ ունեցավ, որում ավելի շատ ասում էր՝ ինչու պետք էր ԵՄ հետ Ասոցացման գնալ, ոչ թե մտնել Մաքսային միություն (ՄՄ): Օրինակ, նա ասաց, թե ՄՄ-ից մեր տնտեսվարող սուբյեկտները կշահեն, քանի որ «անխոչընդոտ մուտք են գործելու սպառողական մեծ շուկա»: Այս տեսակետից՝ 12.5 տրիլիոն դոլար տարեկան ՀՆԱ-ով ԵՄ-ի 500 միլիոնանոց շուկան շատ ավելի մեծ էր ու գրավիչ, քան թե 2 տրիլիոն դոլար տարեկան ՀՆԱ-ով ՄՄ-ի 170 միլիոնանոց շուկան: «Երրորդը՝ շուկայական պայմանների էական բարելավումն է: Այդ գործոնն առնչվում է նաև չորրորդ գործոնի՝ տեխնիկական խոչընդոտների վերացման հետ, քանի որ մենք ձևավորում ենք միասնական տեխնիկական կանոնակարգման դաշտ, և դա նշանակում է, որ մեր ազգային ռեժիմներով արտադրված ապրանքներն ու ծառայություններն առանց որևէ լրացուցիչ պայմանների կարող են արտահանվել ՄՄ տարածք»,- ասաց վարչապետը: Պարզ է, որ միասնական տեխնիկական կանոնակարգման դաշտ ԵՄ-ի հետ ձևավորելն անհամեմատ գերադասելի է ՄՄ-ի սովետական կանոնակարգերից:
Կամ՝ որպես ՄՄ մյուս առավելություն վարչապետը նշեց ռուսական ներդրումների հնարավորությունը մեր տնտեսությունում: «Խոսքը «Ռոսնեֆտ»-ի նոր ծրագրի մասին է, որը ենթադրում է Հայաստանում առնվազն 400 մլն դոլարի ներդրում»,- ասաց վարչապետը՝ հավելելով, որ ներդրումներ կարող են լինել նաև ՀՀ ենթակառուցվածքներում: ԵՄ Ասոցացման համաձայնագրի դեպքում, սակայն, այս ներդրումները ներգրավելու հնարավորությունները շատ ավելին էին, քան ՄՄ դեպքում, քանի որ նույն ՄՄ երկրներն իրենք են ներդրումներ փորձում ներգրավել ԵՄ-ից ու ԱՄՆ-ից:
