Օրերս Երևանի քաղաքապետ Տարոն Մարգարյանը պաշտոնական այցելությամբ Վրաստանի մայրաքաղաք Թբիլիսիում էր: Տարոն Մարգարյանի այս այցը բավականին լավ լուսաբանվեց լրատվամիջոցներով: Երևանի քաղաքապետի այս այցին անդրադառնալու կարիք չէր լինի, եթե ընդամենը մի քանի օր անց վրացական լրատվամիջոցները չտեղեկացնեին, որ Թբիլիսիի քաղաքապետի նկատմամբ գործ է հարցուցված: Վրաստանի գլխավոր դատախազությունը Թբիլիսիի քաղաքապետ Գիգի Ուգուլավային մեղադրանք է առաջադրելˋ մեղադրելով նրան պետական միջոցները վատնելու մեջ: Հիրավի, սա խոհրդանշական պետք է լինի Երևանի քաղաքապետի համար: Վերհիշելով Երևանի քաղաքապետարանի գոնե վերջին երկու տարվա գործունեությունը, կարելի է նշել մի քանի դեպք, երբ պետական միջոցները վատնվել են: Փորձենք հիշել դրանցից մի քանիսը.
- «Էրեբունի-Երևան» տոնակատարության վրա ծախսված 200 մլն դրամը,
- 2012 թվականին կամարանցումների նորոգման և գունազարդման համար քաղաքապետարանը հատկացրել է ավելի քան 172 մլն դրամ,
- Երեւանի քաղաքապետարանի՝ 2012-ի բյուջեով 220 միլիոն դրամ է հատկացրել թափառող կենդանիների վնասազերծման նպատակներով:
Հասկանալի է, որ «Էրեբունի-Երևան» տոնակատարությունը շատ քիչ է օգնել երևանցիներին ավելի լավ ապրել, կամ մի քանի հարյուր հազար դոլար գումար մսխած կամարանցումները ավելի հարմար չի դարձրել մեր կյանքը, իսկ թափառող շների մասին կարելի է ավելորդ անգամ չխոսել, քանի որ քաղաքապետարանը կարծես ոչ թե պայքարում է դրանց դեմ, այլ նպաստում է, որ բազմանան: Մենք քաղաքապետարանի կատարած շռայլություններից երեքն ընդամենը նշեցինք, և կարելի է համոզված ասել, որ եթե դատախազությունն ուսումնասիրի, թե ինչպես են ծախսվել այս գումարները, հաստատ պետական գումարների վատնում կհայտնաբերի:
