Վարդան Պետրոսյանի փաստաբան Նիկոլայ Բաղդասարյանը Araratnews-ի հետ հեռախոսազրույցում նշեց, որ դերասանի` սթափության վերաբերյալ ակտը, իրենք ձեռք են բերել բժշկական կենտրոնից, որտեղ տեղափոխել էին Վարդան Պետրոսյանին:
«Մեզ նախաքննական մարմնից չեն տրամադրում դատաբժշկական փորձաքննության եզրակացությունը, որը հարցաքննությունից առաջ պարտավոր են փոխանցել: Իսկ ակտը, որ Վարդան Պետրոսյանը ալկոհոլ օգտագործած չի եղել, մենք ձեռք ենք բերել բժշկական կենտրոնից եւ ոչ նախաքննական մարմնից»,- ասում է Բաղդասարյանը:
Նա նշում է, որ ավտովթարի 3D մոդելավորումը դեռեւս ընթացքի մեջ է, եւ պատրաստ լինելու դեպքում հնարավոր կլինի լիարժեք տեսնել ու պատկերացում կազմել, թե ինչպես է եղել ավտովթարը:
«Ընդամենը մի քանի օր սպասենք եւ լիարժեք հասկանալի կլինի, թե ինչ է կատարվել մեքենայի մեջ, ով որտեղ է նստած եղել»,-ասում է Բաղդասարյանը:
Նա հավելում է, որ պետք է իրավական հիմք ներկայացվեր Վարդան Պետրոսյանին կալանավորելու համար, եւ միայն հիմնավոր կասկածը մարդուն կալանքի տակ պահելու համար հիմք չէ:
«Օրենքի կոպիտ խախտում է եղել նաեւ առողջական ծանր վիճակում Վարդան Պետրոսյանին դատարան տեղափոխելը»,-նշում է Բաղդասարյանը:
Լիլիթ Առաքելյան
