Վրաստանում 2020թ․ միջազգային չափանիշներին համապատասխանող նոր համալսարան կգործի։ Այս մասին հայտարարել է «Վրացական երազանք» կուսակցության առաջնորդ, միլիարդատեր Բիձինա Իվանիշվիլին: Հայտնում է «Ազատություն»-ը
Երկրի մեծությամբ երկրորդ քաղաքում` Քութաիսում կառուցվող այս համալսարանի ուսումնական մասնաշենքերի, լաբորատորիաների և հանրակացարանների շինարարության վրա Իվանիշվիլիի ընտանիքի կողմից ստեղծված «Քարթու» հիմնադրամը խոստանում է շուրջ 1 միլիարդ եվրո ծախսել:
Նախագծի հեղինակները նշում են, որ ուսումնական հաստատությունը կոչվելու է «Քութաիսի միջազգային համալսարան» և սերտորեն համագործակցելու է Գերմանիայի առաջատար կրթական կենտրոններից մեկի`Մյունխենի տեխնիկական համալսարանի հետ:
Դեռևս կառուցման փուլում գտնվող համալսարանի պաշտոնական շնորհանդեսը կայացավ Քութաիսում չորեքշաբթի օրը:
«Քարթու» հիմնադրամի վարչության նախագահ Նիկոլոզ Չխետիանիի խոսքով էլ՝ համալսարանի շինարարությունը անկախ Վրաստանի գոյության երեք տասնամյակների ընթացքում իրականացվելիք թերևս ամենածավալուն նախագիծը կլինի:
Համալսարանը կսկսի գործել 2020 թվականի աշնանը` Վրաստանում կայանալիք խորհրդարանական ընտրություններից հաշվված շաբաթներ առաջ:
