Հոկտեմբերի 5-ին Երևանի մաթեմատիկական մեքենաների գիտահետազոտական ինստիտուտի տարածքում տեղի է ունեցել Սևծովյան տնտեսական համագործակցության կազմակերպության (ՍԾՏՀ) տեղեկատվական և հաղորդակցման տեխնոլոգիաների (ՏՀՏ) բարձրաստիճան պաշտոնյաների մասնակցությամբ կոնֆերանս: Այս մասին ասվում է էկոնոմիկայի նախարարության այսօր տարածած հաղորդագրությունում: Միջոցառմանը մասնակցել և ողջույնի խոսքով հանդես է եկել ՀՀ էկոնոմիկայի նախարարի տեղակալ Գարեգին Մելքոնյանը:
Կոնֆերանսը կազմակերպվել էր ս.թ. հուլիսի 1-ից դեկտեմբերի 31-ը ՍԾՏՀ կազմակերպությունում Հայաստանի նախագահության շրջանակում:
Կոնֆերանսի ընթացքում ներկայացվեցին ՍԾՏՀ կազմակերպության անդամ-երկրների ՏՀՏ ոլորտի վերջին զարգացումները, Ինկուբատորների ասոցիացիայի ստեղծման ծրագիրը: Ներկայացվեց նաև Հայաստանում ազատ տնտեսական գոտիների ստեղծման ծրագրի վերաբերյալ շնորհանդես:
Կոնֆերանսի ավարտին մասնակիցների կողմից միաձայն ընդունվել է որոշում՝ ՍԾՏՀ Ինկուբատորների ասոցիացիայի ստեղծման վերաբերյալ: Կոնֆերանսի մասնակիցներն այցելել են նաև «Դիջիթեք 2013» ՏՀՏ ոլորտի միջազգային ամենամյա ցուցահանդես:
