Ստամբուլյան կոնվենցիան ԱԺ օրակարգում չկա, այն պաշտոնապես շրջանառության մեջ չի դրվել: Այս մասին ԱԺ-ում Եվրոպայի խորհրդի բարձրաստիճան պաշտոնյաների մասնակցությամբ տեղի ունեցած քննարկումից հետո լրագրողների հետ զրույցում նշեց ԱԺ պետաիրավական հարցերի հանձնաժողովի նխագահ Վլադիմիր Վարդանյանը:
«Պաշտոնապես շրջանառության մեջ դրվելու համար պետք է անցնի որոշակի գործընթաց՝ կառավարություն, ՍԴ, ԱԺ, որից հետո խոսենք վավերացման մասին»,- ասաց Վարդանյանը՝ նշելով, որ Հայաստանը Եվրոպայի խորհրդի անդամ է, և պետք է ընթանանք այդ ճանապարհով։
«Այլ կոնվենցիաներ կան, որ վավերացվել են ՀՀ-ի կողմից, որոնք ավելի կարևոր նշանակություն կարող են ունենալ»,- նշեց Վարդանյանը:
Նրա խոսքով՝ որպեսզի քննադատենք այս կամ այն փաստաթուղթը, անհրաժեշտ է այն հստակ ընթերցել, հասկանալ, թե ինչ հիմնավորումներ են դրվել դրա հիմքում։
Նշենք, որ այսօր ԱԺ-ում տեղի է ունեցել պատգամավորների և Եվրախորհրդի բարձրաստիճան ներկայացուցիչների համատեղ քննարկումը՝ կապված Ստամբուլյան կոնվենցիայի վավերացման հետ: Քննարկումը փակ էր: Հանդիպմանը մասնակցել են Վենետիկի հանձնաժողովի փոխնախագահ Վերոնիկա Բելկովան և Գրեվիոյի նախագահ Մարսելին Նաուդին:
