Ստամբուլի քաղաքապետի գլխավոր թեկնածուի բանկային հաշիվները սառեցվել են

Ստամբուլի քաղաքապետի գլխավոր թեկնածու, ընդդիմադիր Ժողովրդա-հանրապետական կուսակցությունը ներկայացնող Մուսթաֆա Սարըգյուլի բանկային հաշիվները սառեցվել են։ Այս մասին հայտարարել է Թուրքիայի խնայողական ավանդների ապահովագրման ֆոնդի ներկայացուցիչը։ Տեղեկանում ենք Hurriyet daily news-ից։

Ըստ վերոնշյալ ֆոնդի ներկայացուցչի՝ ընդդիմադիր քաղաքական գործչի բանկային հաշվի սառեցման պատճառը հենց Սարըգյուլի և նրա բիզնես-գործընկերների մեղքն է, քանի որ նրանք չեն կարողացել մարել դեռևս 1998 թվականին վերցրած վարկը։

Շատերը Թուրքիայում կարծում են, որ այս քայլը ևս հանդիսանում է այն գործողությունների տրամաբանական շարունակությունը, որ նախաձեռնել են թուրքական իշխանությունները կոռուպցիոն սկանդալի համատեքստում։

Հիշեցնենք, որ դեկտեմբերի 17-ին Թուրքիայում կոռուպցիոն սկանդալի գործով իրականացվող գործողությունների արդյունքում առնվազն 500 ոստիկան է զրկվել իր զբաղեցրած պաշտոնից, ինչին հետևել են այսգործի քննությամբ զբաղվող պաշտոնյանների զանգվածային հեռացումները ոստիկանության շարքերից, ինչը համարում են թուրքական կառավարության պատասխան քայլն իրավապահների սկսած գործողությունների դեմ։