Սոցիալ Դեմոկրատ Հնչակյան կուսակցության Հայաստանի կազմակերպությունը, վերլուծելով 1991 թ-ից մինչև այսօր մեր Հայրենիքում վարվող ներքին քաղաքականությունը, արձանագրում է.
Մեկը մյուսին հաջորդող իշխանությունները փոխում են անձանց, բայց ոչ երբեք համակարգը:
- Այս համակարգը կոչված է հարուստին հարստացնելու և աղքատին ավելի աղքատացնելու:
- Վերջին 24 տարիների ընթացքում իրար հաջորդող իշխանությունների թեթև ձեռքով ոչնչացվել և օտարին է հանձնվել Հայաստանի ազգային հարստությունը, որը հանդիսանում է Հայաստանի ինքնիշխանության կարևորագույն՝ բաղկացուցիչ մաս:
- Հայաստանն այլևս սուվերեն պետություն չէ ներքին ռեսուրսների օգտագործման առումով: Առկա համակարգը կուլ է տվել Հայաստանի էներգետիկ, հանքարդյունաբերական, արտադրական համակարգերը, տեղական արտադրողը խեղդված է, իսկ Հայաստանից ամեն տարի դուրս են բերվում միլիարդավոր դոլարների հասնող գումարներ:
- Հայաստանում առկա է ընկերային անարդարության մի համակարգ, որը երկիրը տանում է դեպի գաղութացման:
- Հայաստանում շատ մեծ թվերի է հասնում արտագաղթն ու գործազրկությունը, իսկ աշխատավոր զանգվածը, որի հիմնական գործատուն օլիգարխիան է, զրկված է սեփական իրավունքները պաշտպանելու գեթ մեկ տարրական հնարավորությունից:
- Հայաստանում չեն գործում աշխատավոր մարդուն պաշտպանելուն ուղղված արհմիությունները, խախտված է վիճակում է 8-ժամյա աշխատանքային գրաֆիկը:
Ելնելով այս ամենից և փաստելով, որ Հայաստանում կայացած չէ քաղաքական համակարգը, ՍԴՀԿ-ն կոչ է անում բոլոր ձախ ուղղվածություն ունեցող քաղաքական ուժերին օր առաջ համախմբվել և ստեղծել ամուր և միասնական միություն՝ հանուն սոցիալական արդարության և օլիգարխիկ համակարգի դեմ քաղաքական պայքար սկսելու համար: Այս նպատակով ՍԴՀԿ-ն սկսում է խորհրդակցություններ առանց բացառության բոլոր ձախ ուժերի, այդ թվում նաև ձախակողմյան գաղափարախոսություն կրող անհատների հետ, ընդհանուր միասնական պլատֆորմ ստեղծելու համար: Սոցիալ Դեմոկրատ Հնչակյան կուսակցությունն արդեն 2014 թ-ի սկզբին կտեղեկացնի հանրությանը իր գործողությունների և անելիքների մասին:
ՍԴՀԿ մամլո դիւան
