Բրիտանական The Guardian-ին տված հարցազրույցում Թուրքիայի նախագահ Աբդուլլահ Գյուլը զգուշացրել է, որ «Սիրիան վերածվում է Միջերկրականի ափերի Աֆղանստանի»։ Նա ասել է, որ Սիրիայի ժողովուրդը մահանում է անտարբեր հայացքների ներքո։
Սովորական բնակչության ծայրահեղականացումը տեղի է ունենում Սիրիայի ողջ տարածքում, ինչը վտանգ է ներկայացնում նաև հարևան պետությունների և Եվրոպայի համար։ Սակայն այս ամենի պատասխանատվությունն, ըստ Գյուլի, կրում են նաև Թուրքիայի դաշնակից ԱՄՆ-ն և Մեծ Բրիտանիան, որոնք չեն կանխում անվտանգության, հումանիտար և բարոյական վտանգները։ Նա խայտառակություն է որակել ՄԱԿ-ի անվտանգության գործունեությունն այս հարցում։
