Սիրիայի փոխարտգործնախարար Ֆեյսալ Միքդադը հայտարարել է, որ եվրոպական մի շարք երկրների հատուկ ծառայությունների ներկայացուցիչներ այցելել են Դամասկոս, որտեղ պաշտոնական անձանց հետ քննարկել են անվտանգության հարցեր։ Այս մասին հաղորդում է BBC-ն։
«Չեմ թվի, սակայն, այո, շատերն այցելել են Դամասկոս», ասել է Միքդադը BBC-ին, նշելով, որ հանդիպումների ժամանակ քննարկվել են անվտանգության ոլորտում համատեղ գործունեության հնարավորությունները։ Ավելի վաղ The Wall Street Journal-ը հայտնել էր, որ Ֆրանսիայի, Գերմանիայի, Իսպանիայի և Մեծ Բրիտանիայի հատուկ ծառայությունների ներկայացուցիչները գաղտնի հանդիպումներ են ունեցել Բաշար Ալ-Ասադի կառավարության ներկայացուցիչների հետ՝ փոխանակելով նրանց հետ ահաբեկիչների վերաբերյալ տեղեկությունները։
