ԳԱԼԱ-ն երեկ հրապարակել էր տեղեկություն, համաձայն որի Սարդարապատի հերոսամարտի հուշահամալիր, Հայոց ազգագրության և ազատագրական պայքարի պատմության ազգային թանգարանի տնօրեն Կարեն Արիստակեսյանը վիճաբանել է թանգարանի աշխատակցուհիների հետ, որից հետո նրանցից երկուսին շտապ բուժօգնության մեքենաներով տեղափոխել են հիվանդանոց: ԳԱԼԱ—ի աղբյուրների փոխանցմամբ՝ տեղի է ունեցել նաեւ ծեծկռտուք: Եվ ոչ միայն տնօրեն Կարեն Արիստակեսյանը, այլ նաեւ թանգարանի մեկ այլ աշխատակցուհի Վարդիկը, որի մասին թանգարանում խոսում են, որ Կարեն Արիստակեսյանի ընկերուհին է, ֆիզիկական բռնության են ենթարկել 50-ամյա եւ 60-ամյա աշխատակցուհիներին: Նրանք արդեն երրորդ օրն է՝ գտնվում են Արմավիրի բժշկական կենտրոնում եւ ստացիոնար բուժման են ենթարկվում:
ՀՀ ՊՆ-ն սակայն հերքում է տեղեկությունը: ՊՆ մամլո խոսնակ Արծրուն Հովհաննիսյանը ԳԱԼԱ-ի հետ զրույցում ասաց.
«Դա չի համապատասխանում իրականությանը: Մանրամասներ չեմ կարող ձեզ հաղորդել, որովհետեւ ինչ- որ մի միջադեպ չէ, որ արժե չգիտեմ ինչ սարքել: Միջադեպ է տեղի ունեցել, կոլեկտիվ է, կոլեկտիվի մեջ ինչ -որ բաներ կարող է եղած լինել, ինչը չեմ կարծում` որեւէ կոլեկտիվում եղած չլինի: Գիտենք, որ այդ հարցում զբաղվում են համապատասխան մարմինները, այլեւս մեկնաբանության կարիք չկա: Նման բան տեղի չի ունեցել՝ ինչպես ներկայացված էր»: ԳԱԼԱ-ի այն հարցին, թե սա արդյո՞ք նշանակում է այն, որ Ա. Հովհաննիսյանը հերքում է նաեւ թանգարանի երկու աշխատակցուհիների հիվանդանոցում գտնվելու փաստը, ՊՆ խոսնակը պատասխանեց.
«Ես չեմ ճանաչում, այդ երկու կանայք կարող է լինեն հիվանդանացում ուրիշ նպատակով, կարող է իրենք հիվանդ են, գնացել են հիվանդանոց, ես ի՞նչ իմանամ: Դա մեկ եւ հետո քանի որ համապատասխան կառույցները զբաղվում են այդ մարդկանց հիվանդանոց գնալու հետեւանքով, արդյունքը` ճիշտն ու սխալ իրենք կգնահատեն»:
Մանրամասները` galatv.am — ում
