Երևանի քաղաքապետարանը գումար չի փոխանցել «Սանիթեք» ընկերությանը՝ աշխատանքային պարտականությունները հավուր պատշաճի չիրականացնելու համար: Այս մասին գրում է «Արմենպրես»—ը՝ հղում անելով Երևանի քաղաքապետի մամուլի խոսնակ Հակոբ Կարապետյանին:
Անդրադառնալով քաղաքապետարանի դիմաց «Սանիթեք» ընկերության աշխատակիցների բողոքի ակցիային՝ Հակոբ Կարապետյանը նշեց, որ «Սանիթեքի» աշխատակիցներն աշխատավարձերի հետ կապված բողոքները փոխանցեն իրենց տնօրինությանը:
«Սանիթեքի» աշխատակիցների պնդմամբ՝ քաղաքապետարանը հրաժարվել է ընդունել օգոստոս ամսվա հաշիվ-ապրանքագրերը և կատարողականները:
«Երևանի քաղաքապետարանը չի կարող երևանցիների գումարը փոխանցել «Սանիթեքի» տնօրինությանը՝ իրենց չարված աշխատանքի համար: Մեր գործողություններն այդ առումով բխում են օրենսդրությունից և պայմանագրից: Երևանի քաղաքապետարանը որևէ տնտեսավարողի, կազմակերպության կամ հանրային ծառայություն մատուցողի նկատմամբ պատժամիջոցներ կիրառում է ըստ պայմանագրի, օրենսդրության ու նախատեսված դեպքերի»,- նշեց Կարապետյանը:
Նրա խոսքով՝ իրենք միանգամայն հասկանում և ըմբռնումով են մոտենում «Սանիթեքի» աշխատակիցների բողոքին, սակայն հասցեատերը Երևանի քաղաքապետարանը չէ:
